Зеленский: Украина илк баллистик ракетасини яратди ва синовдан ўтказди

^{Фото: president.gov.ua}
Украина ҳарбий-саноат комплексини ривожлантиришда давом этмоқда – мамлакат ўзининг илк баллистик ракетасини яратди ва синовдан ўтказди, деди президент Володимир Зеленский матбуот анжуманида.

«Украинада яна қандай янгиликлар бор? Хўш, мен бу ҳақда гапиришга ҳали эрта деб ўйладим, лекин ... Украинанинг биринчи баллистик ракетаси синови ижобий бўлди. Ҳарбий-саноат комплексимизни бу билан табриклайман», деди Зеленский.

Украина раҳбари ракета ҳақидаги бошқа маълумотни ошкор қила олмаслигини айтди. Унинг сўзларига кўра, у жамият «мудофаа корхоналарида 24/7 режимида ишлайдиган одамларни» қадрлаши учун бу ҳақда гапиришга қарор қилган.

Матбуот анжумани чоғида Зеленский Ғарб ҳамкорлари узоқ масофага мўлжалланган қуролларини Россия ҳудудидаги ҳарбий нишонларга қарши қўллашга рухсат бериш ҳақида нима деяпти, деган саволга ҳам жавоб берди. «Улар бу ҳақда мен билан гаплашмасликка ҳаракат қилишади. Ва мен бу саволни кўтараман. Асосан, шундай: Олимпиада тугади, лекин пинг-понг қолди», деди Украина раҳбари.

25 август куни Володимир Зеленский яна бир янги қурол – Украинанинг узоқ масофали «Паляница» ракета-дронидан муваффақиятли фойдаланганини эълон қилди. У бир ярим йил ичида ишлаб чиқилган ва 600-700 километр масофагача учади. «Украинска правда» нашри ракета ҳақидаги деярли барча маълумотлар махфий эканлигини ва унинг зарба масофасида «йигирмалаб Россия ҳарбий аэродромлари» борлигини ёзди. “Замин” янгиликларини “Telegram”да кузатиб боринг