Трамп сайловда ютганини эълон қилди: “Урушларни тўхтатмоқчиман”

^{Фото: CNN}
АҚШда республикачилар партиясидан президентликка номзод Дональд Трамп сайловда ғалаба қозонганини эълон қилди. У Флоридадаги тарафдорлари қаршисида нутқ сўзлади. Бу ҳақда BBC хабар берди.

"Мен Америка халқига миннатдорчилигимни билдирмоқчиман. Сизлар томондан қирқ еттинчи ва қирқ бешинчи президент этиб сайланганим фавқулодда шарафдир", деди у.

Сиёсатчи прогнозига кўра, у жами 315 дан ортиқ овозни қўлга киритган. Ғалаба қозониш учун эса 270 та овоз зарур. Трамп сайловчиларга унинг бошқаруви АҚШ тарихида “олтин давр” бўлишини ваъда қилмоқда.

"Тўрт йил давомида биз ИШИДга қарши ғалабамиздан ташқари ҳеч қандай урушни кўрмадик. Биз ИШИДни рекорд муддатда тор-мор этдик, аммо бошқа ҳеч қандай уруш олиб бормадик. Мен уруш бошламоқчи эмасман, аксинча, уларни тўхтатмоқчиман", деди у.

Шунингдек, сиёсатчи республикачилар Сенат устидан назоратни қайтариб олганини ва Вакиллар палатасини сақлаб қолишини маълум қилди. Шу тариқа партия Конгрессга раҳбарлик қилади.

Агар Трамп яна Оқ уйга қайтадиган бўлса, бу АҚШ тарихида бир инсоннинг икки муддат кетма-кет бўлмаган ҳолда мамлакатни бошқариши бўйича иккинчи ҳолат бўлади. Бундай президентлардан биринчи ХIX аср охирида Гровер Кливленд бўлган.

Дунё етакчилари Трампни ғалаба билан табриклай бошлади. Улар қаторида Франция президенти Эммануэль Макрон, Исроил бош вазири Биньямин Нетаньяху, Сербия президенти Александр Вучич, Австрия канцлери Карл Нехаммер, Британия бош вазири Кир Стармер ҳам бор. “Замин” янгиликларини “Одноклассники”да кузатиб боринг