Киев: Трамп инаугурациясигача «тинчлик режалари» ҳақидаги гаплар асоссиз

^{Фото: Julia Demaree Nikhinson / AP}
АҚШ янги сайланган президенти Доналд Трампнинг инаугурацияси олдидан оммавий ахборот воситаларида чоп этилган Россия Федерацияси ва Украина ўртасидаги ҳарбий можарони ҳал қилиш бўйича ҳар қандай сценарийлар ҳақиқатга мос келмайди, деди Украина Дезинформацияга қарши кураш маркази (ДҚКМ) раҳбари Андрей Коваленко, 10 ноябр, якшанба куни телемарафонда.

«Буларнинг барчаси оммавий ахборот воситалари учун ҳам, бу воқеаларни тарқатадиган маълум шахслар учун ҳам ҳайпдир», деди у ва Россия томони, хусусан, тинчлик режалари ҳақидаги хабарни тарқатишдан манфаатдор эканини қўшимча қилди.

Коваленконинг таъкидлашича, америкалик республикачиларнинг Украина ҳақидаги ҳар қандай баёнотига Трампнинг янги маъмурияти якуний шаклланмагунча «шубҳа билан» муносабатда бўлиш керак. «Америка сиёсатчиларининг Украина бўйича ҳар қандай баёноти фақат уларнинг шахсий фикри», — дея таъкидлади ДҚКМ раҳбари.

Трамп жамоаси «йўқотилган Қрим» ҳақида гапиришдан бош тортди

Бир кун аввал, 9 ноябрда Трамп сайловолди ташвиқоти вақтида ишлаган республикачи Брайан Ланза Украина Россия томонидан қўшиб олинган ҳудудлар, хусусан, Қримни қайтаришга эмас, балки тинчликка эришишга эътибор қаратиши кераклигини айтган эди. «Бизда президент Зеленский учун янгилик бор: Қрим энди йўқ, агар сизнинг устувор вазифангиз Қримни қайтариш ва америкалик аскарларни Қримни қайтариш учун курашишга мажбурлаш бўлса, демак, сиз ёлғизсиз», — дея қўшимча қилди Ланза.

Шу куни Трампнинг ўтиш штаби Reuters агентлигига Ланза энди АҚШнинг сайланган президенти учун ишламаслигини ва Украина ҳақида «Трамп номидан» гапирмаётганини маълум қилди. “Замин” янгиликларини “Telegram”да кузатиб боринг