Британия Украинага узоққа учувчи ракеталар етказиб беришни тўхтатди

^{Фото: Getty Images}
Буюк Британия захиралар етишмаслиги сабабли Украинага узоқ масофага учадиган Storm Shadow ракеталарини етказиб беришни тўхтатди. Бу ҳақда манбаларга таяниб Тhе Times хабар берди.

Британия Мудофаа вазирлигидаги манбалар Storm Shadow етказиб бериш тўхтатилишини захираларни сақлаб қолиш нияти билан боғлади. Мамлакатдаги айрим мулозимлар Россиядаги объектларга қўллашга рухсат берилмагунча узоқ масофага учувчи ракеталарни беришни истамайди. Улар ушбу ракеталардан қисқа масофаларда фойдаланиш унчалик самарали эмаслигини айтмоқда.

The Guardian газетасининг ёзишича, Буюк Британияда Кир Стармер бошчилигидаги лейбористлар ҳокимият тепасига келгач, Лондон ва Киев ўртасидаги муносабатлар ёмонлашди. Украина охирги марта октябрь ойида Storm Shadow ракеталаридан фойдалангани ҳақида хабар берган.

“Британия АҚШ Украинага Россия ҳудуди ичкарисига зарба бериш учун Ғарбнинг узоққа учадиган ракеталаридан фойдаланишга рухсат беришига умид қилмоқда”, дейилади хабарда.

Бу мавзу яқин кунларда Бразилияда бўлиб ўтадиган G20 саммити доирасида Стармер ва АҚШ президенти Жо Байден томонидан муҳокама қилинади. Лондон яқин орада Киевга ҳарбий дронлар ва “Украина учун янги денгиз имкониятлари”дан иборат навбатдаги ёрдам пакетини бериши кутилмоқда.

“Биз операцион захиралар ҳақида изоҳ бермаймиз. Шунга қарамай, Буюк Британиянинг Украинага бўлган қўллаб-қувватлови қатъийдир. Бош вазир ҳар доим ўз ҳукуматининг Украинага қанча керак бўлса, шунча ёрдам беришини аниқ айтиб келган”, дейди Британия Мудофаа вазирлигини расмий вакили.

Storm Shadow — узоқ масофага учувчи ва юқори аниқликка эга бўлган ҳаво-ер синфидаги қанотли ракета. Дастлаб Буюк Британия ва Франция ҳамкорлигида ишлаб чиқилган. Унинг учиш масофаси 560 километрдан ошади. Бу ракета одатда стратегик ва юқори даражада муҳофазаланган нишонларни йўқ қилишга мўлжалланган. “Замин” янгиликларини “Facebook”да кузатиб боринг