АҚШ ядро қуролини Украинага қайтариш имкониятини кўриб чиқмаяпти

^{Фото: Reuters}
АҚШ президенти миллий хавфсизлик бўйича ёрдамчиси Жейк Салливаннинг айтишича, Оқ уй Украина Қуролли кучлари «ўзини самарали ҳимоя қилиши ва Россияга қарши жанговар ҳаракатлар олиб бориши» учун Украинани оддий қуроллар билан таъминлашга эътибор қаратади. Унинг таъкидлашича, Вашингтон Киевга ядро қуролини қайтаришни режалаштирмайди.

The New York Times (NYT) 21 ноябр куни ўз номини ошкор этмаган америкалик расмийларга таяниб, Украинага ядро қуроли қайтарилиши мумкинлиги ҳақида мақола чоп этган эди. Америка президенти ёрдамчисининг таъкидлашича, Киев ядро арсенали билан таъминланмайди, аммо амалдаги давлат раҳбари Жо Байден маъмурияти «Конгресс томонидан ажратилган ҳар бир долларни» Украинага ёрдам бериш учун сарфлаш мақсадида ҳамма нарсани қилади.

«Ушбу 50 кун ичида биз Украинани музокаралар столида кучлироқ бўлиши, жанг майдонида ўз позициясини мустаҳкамлаши учун барча мумкин бўлган воситалар билан таъминлаш учун қўлимиздан келганини қиламиз. Президент Байден эса менга Украинага юборилаётган ҳарбий техниканинг кенг кўламли етказиб берилишини назорат қилишни буюрди», деди Салливан.

Совет Иттифоқи парчаланганидан кейин Украина совет ядро арсеналининг муҳим қисмини мерос қилиб олди ва дунёдаги учинчи ядровий давлатга айланди. Бироқ, Украина ядровий қурол билан боғлиқ улкан масъулият ва хавфларни тан олиб, тинчлик ва хавфсизлик фойдасига стратегик танлов қилди.

1994 йилда Украина Будапешт меморандумини имзолади, унга кўра у Россия, АҚШ, Буюк Британия ва бошқа мамлакатларнинг хавфсизлик кафолатлари эвазига ядровий қуролдан воз кечди. Кейинги йилларда Украина ўзининг барча ядро каллаклари ва ташиш воситаларини доимий равишда йўқ қилиб, ядро қуролини тарқатмасликка содиқлигини яна бир бор тасдиқлади. “Замин” янгиликларини “Facebook”да кузатиб боринг