ҲАМАС баёнот берди: Ғазодаги уруш тугаши мумкин

^{Фото: AFP}
Фаластиннинг ҲАМАС ҳаракати 17 декабрь куни Қатарда ўт очишни тўхтатиш бўйича жиддий ва ижобий музокаралар ўтказилганини айтди. Бу ҳақда Anadolu хабар берди.

Маълум қилинишича, агар Исроил ўт очишни тўхтатиш бўйича янги шартлар қўйишни тўхтаца, келишувга эришиш мумкин бўлади. ҲАМАС бу борада Қатарда яҳудий расмийлари билан музокаралар бўлиб ўтганини айтди. Музокаралар воситачи давлатлар — Қатар ва Миср ҳомийлигида ўтказилган.

"Ўт очишни тўхтатиш ва асирларни айирбошлаш тўғрисидаги келишувга эришиш фақат босқинчи янги шартлар қўймаган тақдирдагина мумкин бўлади", дейилади ҲАМАС баёнотда.

2023 йил ноябрь ойида ҲАМАС ва Исроил маҳбусларни айирбошлади ва Ғазо секторида вақтинчалик ўт очишни тўхтатишга эришди. Исроил тахминан бир ҳафта давом этган ўт очишни тўхтатишдан сўнг Ғазога ҳужумларини қайта бошлади. ҲАМАС юзга яқин исроиллик асирни ушлаб тургани айтилмоқда.

Уруш бир ой ичида тугаши мумкин

Ғазо секторидаги ўт очишни тўхтатиш ва гаровга олинганларни озод қилиш бўйича келишувга бир ой ичида эришиш мумкин. Бу ҳақда музокаралардан хабардор манбаларга таяниб, The Jerusalem Post хабар берди. Музокараларда сезиларли ютуқларга эришилган.

ҲАМАСнинг асосий хавотири шундаки, Трамп АҚШ президенти лавозимини расман эгаллаганидан кейин 40-60 кун давом этиши тахмин қилинган келишувнинг бир босқичида унинг бузилиши эҳтимоли мавжуд. ҲАМАС шу сабабли 20 январь куни сайланган АҚШ президентининг инаугурациясига қадар Исроил билан шартнома тузишга ҳаракат қилади.

^{Фото: UNICEF}
Исроил ҳужуми оқибатида Ғазо секторида ҳалок бўлганлар сони 45 минг кишидан ошди. Қурбонлар орасида 17 минг нафар бола бор. 11 минг бедарак йўқолган, улар вайроналар остида қолиб кетгани тахмин қилинмоқда. “Замин” янгиликларини “Одноклассники”да кузатиб боринг