Лас-Вегасдаги Трамп меҳмонхонаси ёнида Tesla портлади

^{Фото: Ижтимоий тармоқлар}
1 январ, чоршанба куни Лас-Вегасда АҚШнинг сайланган президенти Доналд Трампга тегишли Trump International Hotel меҳмонхонаси олдида Tesla Cybertruck электр пикапи портлаб кетди. Салондаги одам ҳалок бўлди, воқеа жойида бўлган яна етти киши енгил тан жароҳати олди. Портлаш маҳаллий вақт билан 08.40 лар атрофида содир бўлган.

Маҳаллий шериф Кевин Макмэхиллнинг айтишича, портлашдан аввал электромобил меҳмонхонага кириш жойигача борган ва унинг олдида тўхтаган, деб ёзади The New York Times. Associated Press агентлиги аноним қолишни истаган маҳаллий ҳуқуқ-тартибот идоралари вакилларига таяниб, Cybertruck'га фейерверклар ортилган бўлганини маълум қилди.

Айни пайтда, Америка Қўшма Штатлари Президенти Жо Байденнинг айтишича, бу воқеа ва янги йил кечасида Янги Орлеанда оломонга автомашина ҳужуми ўртасидаги боғлиқлик версияси текширилмоқда.

Маск: Портлаш сабаби - пикапда эмас

Электр автомобилларини ишлаб чиқарувчи компания эгаси, миллиардер Илон Маск ўзининг X ижтимоий тармоғида портлаш ҳақидаги изоҳлар билан бир қатор постларни чоп этди. «Tesla бутун раҳбарияти ҳозир нима бўлганини текширмоқда, - деб ёзган Маск Флоридада Трампнинг янги йил зиёфатида қатнашганидан кейин ўзининг биринчи твитида. - Биз ҳеч қачон бундай нарсани кўрмаганмиз».

«Биз портлашга ижарага олинган Cybertruck'да олиб ўтилаётган жуда катта миқдордаги фейерверк ва/ёки бомба сабаб бўлганини ва бу транспорт воситасининг ўзи билан боғлиқ эмаслигини тасдиқладик», деди тадбиркор портлаш пайтида ундан олинган телеметрия мутлақо нормал бўлганини таъкидлаб.

Кейинги твитларидан бирида Маск шундай ёзган: «Ёвуз аҳмоқлар террорчилик ҳужуми учун нотўғри машина танлаган. Cybertruck портлашни ўзи қайтара олган ва уни юқорига йўналтирган. Ҳатто (меҳмонхона) вестибюлининг шиша эшиклари ҳам зарар кўрмаган». Миллиардер ушбу постга портлаш оқибатлари акс этган видеони илова қилган. “Замин” янгиликларини “Youtube”да кузатиб боринг