Трамп: Украинадаги вазиятни тинч йўл билан ҳал қилиш бўйича ишлар бошланди

АҚШ президенти Доналд Трамп Россиянинг Украинага қарши урушини тинч йўл билан ҳал қилиш бўйича ишлар аллақачон бошланганини айтди. Бу ҳақда у 23 январ, пайшанба куни Давосда бўлиб ўтаётган Жаҳон иқтисодий форумида видео-алоқа орқали нутқ сўзлаганида маълум қилди. Шу билан бирга, Трамп Россиянинг Украинага қарши урушини давом эттиришига нефт нархининг ҳозирги юқори даражаси ёрдам бермоқда, деган фикрни билдирди. У жангларни тезроқ якунлаш учун уларни қисқартиришга чақирди.

«Мен Саудия Арабистони ва ОПEКдан нефт нархини пасайтиришни сўрайман. Уни тушириш керак! Агар нарх тушиб қолса, Россия ва Украина ўртасидаги уруш дарҳол тугайди», — дея таъкидлади АҚШ президенти.

Ҳозирда нефт нархи бир баррел учун 80 доллар атрофида. Трамп нутқи давомида унинг қиймати деярли бир долларга тушиб кетди.

Путин билан учрашув

Трамп, шунингдек, Украинадаги урушни тугатиш учун яқин вақт ичида Россия президенти Владимир Путин билан учрашишни исташини айтди. «Мен бу урушни тугатиш учун президент Путин билан тез орада учрашишни жуда хоҳлардим. Ва бу иқтисод ёки бошқа нарса нуқтайи назаридан эмас. Бу миллионлаб одамларнинг ҳаёти нуқтайи назаридан муҳим», — дея тушунтирди у.

Трампдан кейинги йилги саммитда яна нутқ сўзлагунга қадар Россия ва Украина тинчлик келишувига эришишига ишонасизми, деб сўралди. «Бу ҳақда Россиядан сўрашингиз керак, Украина келишувга тайёр», деб жавоб берди АҚШ президенти. У Киев ва Москва ўртасидаги эҳтимолий музокаралар ҳақида батафсил маълумот бермади.

АҚШ президенти Хитой мамлакатга Россиянинг Украинага қарши урушини тўхтатишга ёрдам беришига умид билдирди. Унинг сўзларига кўра, Пекин ва Вашингтон ўртасидаги муносабатлар «жуда яхши». «Хитой Россияга урушни зудлик билан тугатиш учун таъсир қилишга етарли кучга эга. Биз буни Хитой билан бирга қиламиз», — деди Трамп.