Путин Трамп билан телефон орқали гаплашишга тайёр

Россия президенти Владимир Путин АҚШнинг янги президенти Дональд Трамп билан суҳбатлашишга тайёр. Бу ҳақда Кремл матбуот котиби Дмитрий Песков маълум қилди.

«Путин тайёр, биз қўнғироқни кутмоқдамиз. Қачонки бу содир бўлса, сизларни хабардор қиламиз», — деди Песков ТАСС агентлигига.

Шунингдек, Россия ва АҚШ президентлари ўртасидаги эҳтимолий учрашув ҳақида ҳам Песков қисқа қилиб изоҳ берди: «Бу борада ҳозирча бошқа маълумот йўқ».

Аввалроқ ОАВда маълум қилинишича, Трамп матбуот билан мулоқот вақтида Путин билан учрашиш учун «зудлик билан тайёр» эканини айтган. Шунингдек, у бу учрашувни ўзи учун муҳим деб ҳисоблашини таъкидлаган.

Эслатиб ўтамиз, Путин аввалроқ АҚШнинг янги маъмурияти билан Украина можаросини муҳокама қилишга тайёрлигини билдирган эди. Дональд Трамп эса ушбу масала юзасидан Кремль раҳбари билан учрашувга қизиқиш билдирган.

Песков шунингдек, Москва Вашингтон билан ядровий қуролларни қисқартириш бўйича музокаралар ўтказишга тайёр эканини айтди. Бироқ бу жараёнда АҚШнинг иттифоқчилари — Буюк Британия ва Франциянинг ядровий имкониятлари ҳам ҳисобга олиниши кераклигини таъкидлади.

«Музокараларни бошлашдан барча тарафлар манфаатдор. Биз бундай жараённи тезроқ йўлга қўйишга тайёрмиз, чунки бу бутун дунё ва халқларимиз манфаатига хизмат қилади», — деди Кремль вакили. “Замин” янгиликларини “Telegram”да кузатиб боринг