Олаф Шолц Доналд Трампни нима учун худбинликда айбламоқда?

Германия канцлери Олаф Шолц Доналд Трампнинг Украинага молиявий ёрдам эвазига АҚШга нодир металларни етказиб бериши кераклиги ҳақидаги талабини танқид қилди. Немис сиёсатчиси бу ҳақда 3 феврал, душанба куни кечқурун Брюсселда бўлиб ўтган Европа Иттифоқининг норасмий мудофаа саммитидан сўнг гапирди.

Шолц: Украина ресурслари мамлакатнинг ўзига керак

«Урушдан кейин керак бўладиган ҳамма нарсани молиялаштириш учун ушбу мамлакат ресурсларидан фойдаланиш керак бўлади», — дея Шолц сўзларини келтиради Reuters. Унга кўра, ҳозир пулни мудофаани қўллаб-қувватлаш учун ишлатиш «жуда худбинлик» бўлади.

Шолц келажакда Украинага кучли армия, шунингдек, мамлакатни қайта тиклаш учун маблағ керак бўлишини таъкидлади. «Украинада рўй бераётган улкан вайронагарчиликни ҳисобга олсак, булар катта вазифалардир. Шунинг учун ҳам Украина ресурсларидан келажак учун фойдаланилса яхши бўларди, деб ўйлайман», — дея қўшимча қилди Германия канцлери.

Трамп: Ёрдам эвазига нодир металлар

Аввалроқ Доналд Трамп Украина Қўшма Штатларга нодир металлар етказиб беришга ваъда берса, унга ёрдам давом этишини айтган эди. «Биз Украина билан шартнома тузмоқчимиз, у ерда улар биз берадиган нарсаларни ўзларининг нодир металлари ва бошқа буюмлари билан таъминлайдилар», деди у.

Трамп Киев Вашингтонга ресурслар етказиб беришини хоҳлайдими, деган саволга АҚШ президенти ижобий жавоб бериб, нодир металларни етказиб бериш бўйича «кафолатга эга бўлишни» истаётганини таъкидлади ва Украина бунга аллақачон тайёр эканини кўрсатди. Оқ уй раҳбарининг сўзларига кўра, у Киевдан кўрсатилган ёрдам учун Вашингтонга «деярли 300 миллиард доллар» товон тўлашини истайди. “Замин” янгиликларини “Telegram”да кузатиб боринг