Фото: EPA
Володимир Зеленский агар Украина НАТОга қабул қилинмаса, ядровий қурол етарлича хавфсизлик кафолати бўлиши мумкинлигини маълум қилди. Бу ҳақда у британиялик журналист Пирс Морганга берган интервюсида қайд этди. Интервю парчалари 4 феврал куни Морганнинг ижтимоий тармоқлардаги саҳифаларида пайдо бўлди.
Журналист Зеленскийдан Украина Владимир Путинни янги ҳужумлардан тийиб туришда қандай хавфсизлик кафолатларини кўриб чиқаётганини сўраган.
Зеленскийнинг таъкидлашича, агар Украинанинг НАТО аъзолигига қабул қилиниши йиллар ёки ўнлаб йилларга чўзиладиган бўлса, унда «мутлақо адолатли савол» юзага келади:
«Ушбу йўлда бизни ҳар доим бу ёвузликдан нима ҳимоя қилади? Қандай ёрдам пакети? Қанақа ракеталар? Бизга ядровий қурол беришадими? Ундай бўлса, бизга ядровий қурол беришсин. Биз Россияни тўхтатиб қолишимизга етадиган миқдорда ракеталар бериладими? Мен бунга ишонмайман, аммо ўйлайманки, бу ёрдам берган бўларди.
Акс ҳолда Россиянинг ядровий ракеталарини қандай ракеталар тутиб қола олади? Бу риторик савол. Шунинг учун келинг қуйидагича йўл тутамиз: бизга ядровий қуролимизни қайтаринг, ракета мажмуаларини беринг, шерикларимиз миллионлик армияни молиялаштиришга кўмаклашади, ўз контингентингизни биз барқарорлик истаётган, инсонлар хотиржам бўладиган ҳудудларимизга жойлаштиринг», — дейди Зеленский.
Зеленскийнинг қўшимча қилишича, агар Украина НАТО аъзоси бўлмаса, «Путин мамлакат ҳудудидан бутунлай чиқиб кетиши керак», шундан сўнг Киев барча йўқотишлар учун молиявий компенсация масаласини кўтаради.
«У [Путин] биз НАТО аъзосига айланишимиз мумкинлигидан қўрқиб ҳужум қилди. Яхши, биз НАТО аъзоси эмасмиз — ерларимизни қайтаринг. Бу худди шундай кўриб чиқилиши керак», — дейди Украина президенти.
Украина 1994 йил декабрда имзоланган Будапешт меморандум доирасида ядровий қуролдан воз кечган. Ҳужжатда ядровий қуролдан воз кечилгани эвазига Украинанинг ҳудудий яхлитлиги кафоланиши кўзда тутилган. Ҳужжатга Россия, Украина, Буюк Британия ва АҚШ имзо чеккан.
