Лавров Россия Украина билан музокараларга тайёр эканини айтди

^{Фото: РИА Новости}
РФ ташқи ишлар вазири Сергей Лавров Россия Украинадаги можарони ҳал қилиш бўйича музокараларга тайёр эканини маълум қилди.

«Президент Путин бу ҳақида кўп маротаба гапиргани каби Россия музокараларга тайёр, унда бизнинг қонунуний манфаатларимиз таъминланиши керак», — дейди Лавров.

Вазирнинг сўзларига кўра, Украина можаросининг «чуқур сабаблари бор». Лавровнинг айтишича, улар қаторида НАТОни кенгайтириш орқали Россия хавфсизлигига таҳдид уйғотиш ва Украина ҳукуматининг «русларга оид ҳамма нарсани йўқ қилиш»га қаратилган сиёсий йўналиши ҳам мавжуд.

ТИВ раҳбарининг қўшимча қилишича, бирламчи сабаблар бутунлай йўқ қилинсагина можарони якунлаш йўли очилиши мумкин.

Аввалроқ Россия президенти Владимир Путин Москва Украина президенти Володимир Зеленский билан музокаралар ўтказишга тайёр эканини, аммо уни якуний тинчлик битимини имзолаши мумкин бўлган легитим президент дея ҳисобламаслигини маълум қилганди. Кўп ўтмай Кремл матбуот котиби Дмитрий Песков Путин Украина президентини «нолегитим» дея ҳисобласа ҳам Россия Зеленский билан музокаралар ўтказишдан бош тортмаслигини билдирди.

Ўз навбатида Зеленский урушни тугатиш учун Путин билан тўғридан тўғри музокаралар ўтказишга тайёрлигини айтди. «Агар бу украинлар учун тинчликка эришиш ва одамларни йўқотмаслик йўлида ягона конфигурация бўлса, албатта, биз бунга борамиз», — деди Украина президенти. “Замин” янгиликларини “Telegram”да кузатиб боринг