Москва ва Киев ўртасида ҳудудларни айирбошлаш мумкин эмас, Россия ҳеч қачон ўз ерларини эҳтимолий айирбошлашни муҳокама қилмаган ва қилмайди. Бу ҳақда Россия президентининг матбуот котиби Дмитрий Песков маълум қилди, деб ёзади Дарё нашри.
Бу мутлақо мумкин эмас. Россия ҳеч қачон ўз ҳудудини айирбошлаш мавзусини муҳокама қилмаган ва қилмайди ҳам, деди Песков.
У Украина кучлари Россия ҳудудидан албатта чиқариб юборилишини таъкидлади.
Украина президенти Владимир Зеленский The Guardian нашрига берган интервьюсида Курск вилоятида Украина қўшинлари назоратидаги ҳудудни Россия томонидан босиб олинган Украина ерларига алмаштиришга тайёр эканлигини айтган эди.
Фото: The Guardian
"Биз бир ҳудудни бошқасига алмаштирамиз", деди Зеленский ва Украина Россия томонидан босиб олинган ерларнинг қайси қисмини сўрашини ҳали аниқ билмаслигини қўшимча қилди.
Украина етакчиси барча ҳудудлар муҳим эканини, улар ўртасида ҳеч қандай устуворлик йўқлигини таъкидлади.
Шунингдек, Зеленский АҚШ президенти Дональд Трамп маъмуриятининг уруш тугаганидан сўнг Украинага хавфсизлик кафолатларини Европа давлатлари бериши кераклиги ҳақидаги ғоясини танқид қилди.
"Европа америкаликларсиз хавфсизлик кафолатларини таклиф қилиши мумкин, деган фикрлар бор ва мен доимо бунга қаршиман", деди у. Зеленскийнинг сўзларига кўра, АҚШ иштирок этмайдиган хавфсизлик кафолатлари “ҳақиқий” эмас.
"Биз тинчликпарвар контингентни қўллаб-қувватлаймиз, агар у хавфсизлик кафолатининг бир қисми бўлса, лекин яна бир бор таъкидлашни истардимки, Америкасиз бунинг иложи йўқ", деди Зеленский ва Трамп билан учрашуви санаси ҳали белгиланмаганини қўшимча қилди.
Россия Ташқи ишлар вазирлигининг расмий вакили Мария Захарова Зеленскийнинг сўзларига изоҳ берар экан, бундай баёнотлар Курск вилоятидаги "Украина Қуролли кучлари учун ҳалокатнинг ҳақиқий кўламини" яшириш мақсадида берилаётганини таъкидлади.
2024 йил 6 августда Украина армияси Курск вилоятида ҳарбий операцияни бошлади. 12 августга келиб, 28 та аҳоли пункти Украина кучлари назоратига ўтгани ҳақида ўша пайтда вилоят губернатори вазифасини бажарувчи Алексей Смирнов хабар берди. Январь ойида Россия Мудофаа вазирлиги Украина томони минтақанинг 1268 кв. км ҳудудини эгаллаб олганини маълум қилди (Курск вилоятининг умумий майдони - 29,9 минг кв. км). Январь ойи ўрталарига келиб, Россия идораси маълумотларига кўра, 801 кв. км (63,2%) қайтариб олишга эришилган.
Киев илгари 1991 йилги чегараларга қайтиш ва Россия қўшинларини ўз ҳудудидан олиб чиқиб кетишни талаб қилган эди. Кейинчалик Зеленский йўқотилган ҳудудларни келажакда дипломатик йўл билан қайтариш мумкинлигини қайд этган.
Москва музокаралар учун очиқлигини, Киев улардан воз кечаётганини таъкидлаб, тўртта янги минтақа ва Қримни Россиянинг бир қисми сифатида тан олишни талаб қилмоқда. “Замин” янгиликларини “Telegram”да кузатиб боринг
Ctrl
Enter
Хато топдИнгизми
Иборани ажратиб Ctrl+Enter тугмасини босингМавзуга оид янгиликлар
