Трамп Путин билан қаерда учрашишини маълум қилди

^{Фото: kremlin.ru}
АҚШ президенти Доналд Трамп ва Россия етакчиси Владимир Путин Россиянинг Украинага қарши урушини тўхтатиш йўлларини муҳокама қилиш учун юзма-юз учрашув ўтказадиган давлат Саудия Арабистони бўлади. Бу ҳақда Трампнинг 12 феврал, чоршанба куни Россия президенти билан телефон суҳбатидан бир неча соат ўтиб Оқ уйда журналистлар билан суҳбати чоғида қилган баёнотида айтилади.

«Биз Саудия Арабистонида учрашамиз», — дея АҚШ давлат раҳбарининг сўзларидан иқтибос келтиради AFP агентлиги. Ҳатто сайловолди ташвиқоти пайтида ҳам Доналд Трамп Украинадаги урушни тугатишга эришиш ниятида эканини бир неча бор таъкидлаган.

Журналистлар билан суҳбатда Трамп, шунингдек, Украинанинг НАТОга аъзо бўлишини мақсадга мувофиқ деб ҳисобламаслигини ва унинг фикрича, Киевнинг Россия назорати остида бўлган барча ҳудудларни қайтариши «имкони йўқ» эканини айтди.

Трампнинг Путин билан телефон суҳбати

CNN таъкидлаганидек, Оқ уй ва Кремл матбуот хизматлари 12 феврал куни хабар берган Трамп ва Путин ўртасидаги телефон суҳбати Трампнинг АҚШ президенти сифатидаги иккинчи муддати бошланганидан бери биринчи тасдиқланган телефон мулоқотидир.

Трампнинг таъкидлашича, президентлар «Россия ва Украина ўртасидаги урушда миллионлаб одамларнинг ўлимини тўхтатишга рози бўлди». Шунинг учун, унинг сўзларига кўра, сиёсатчилар ўз жамоалари «зудлик билан музокараларни бошлаш» ҳақида келишиб олди. АҚШ президенти Украина президенти Володимир Зеленскийга қўнғироқ қилиб, суҳбат ҳақида хабардор қилишга ваъда берди.

«Мен давлат котиби Марко Рубио, Марказий разведка бошқармаси директори Жон Ратклифф, миллий хавфсизлик бўйича маслаҳатчи Майк Уолтц ҳамда элчи ва махсус вакил Стив Виткоффдан музокараларга раҳбарлик қилишни сўрадим», — дея қўшимча қилди у.

CNN маълумотларига кўра, Трамп Зеленский билан 12 феврал куни тушга яқин, Путин билан телефон мулоқоти тугаганидан кўп ўтмай гаплашган.

Айни вақтда Россия президенти матбуот котиби Дмитрий Песковнинг маълум қилишича, суҳбат чоғида Россия етакчиси Доналд Трампни Москвага ташриф буюришга таклиф қилган. Кремлга кўра, Путин ва Трамп ўртасидаги суҳбат тахминан 90 дақиқа давом этган. “Замин” янгиликларини “Telegram”да кузатиб боринг