Қозоғистонда коррупцияда айбланган ҳоким ўринбосари Ўзбекистонда ушланди

^{Фото: Tengrinews}
Оқтов шаҳри ҳокимининг халқаро қидирувга берилган собиқ ўринбосари Темур Саидвақосов Ўзбекистонда қўлга олинди.

Қайд этилишича, собиқ амалдор ноқонуний равишда Қозоғистоннинг Қирғизистон билан чегарасини кесиб ўтган, кейин эса Ўзбекистон ҳудудига ўтаётганида маҳаллий чегарачилар томонидан ушланган.

Энди Саидвақосов 5 йилдан 10 йилгача озодликдан маҳрум этилиши мумкин — Ўзбекистонда бир гуруҳ шахсларнинг олдиндан келишган ҳолда давлат чегарасини бузиб ўтганлиги учун шу турдаги жазо белгиланган.

Ҳоким ўринбосари Қозоғистонда Шимолий-Қозоғистон вилоятидаги «Обуховское» нодир металлар конини ўзлаштираётган «Тиолайн» компанияси фаолияти билан боғлиқ коррупцион жиноятларда гумонланмоқда. Терговнинг ҳисоблашича, корхона акциядорларидан бири — Виктор Долгалев ўз бизнесида қонунбузилишларга йўл қўйган, жумладан, ноқонуний тадбиркорлик билан шуғулланган ва ерости бойликларидан ўзбошимчалик билан фойдаланган.

Аввалроқ суд ҳайъати Долгалевни оқлаган, аммо кўп ўтмай ҳукм бекор қилинган, иш эса бошқа вилоятга қайта кўриб чиқишлик учун юборилган. Тергов версиясида қайд этилишича, бизнесмен ўз муаммоларини амалдорлар, жумладан, Саидвақосов ёрдамида ҳам ҳал этиб келган. Ҳоким ўринбосари фирибгарлик ва пора беришга ундашда айбланмоқда.

Гумонланувчилар қаторига киритилганидан хабар топган ҳоким ўринбосари яширинишга уринган, аммо энди у бирданига иккита давлатда озодликдан маҳрум этилиши мумкин — Қозоғистонда коррупцион жиноятлари учун, Ўзбекистонда эса чегарани ноқонуний бузгани учун. “Замин” янгиликларини “Telegram”да кузатиб боринг