Фото: Украина президенти матбуот хизмати
Украина президенти Владимир Зеленский ўз лавозимини ушлаб турмаслигига ва уруш тугаб, Украина хавфсизлиги таъминланганида уни тарк этишга тайёрлигини айтди. Бу ҳақда у Германиянинг АРД телеканалидаги Майшбергер ток-шоусида маълум қилди, деб ёзмоқда Дарё нашри.
“Мен ҳар қандай нарсага тайёрман, ҳақиқатан ҳар нарсага. Узоқ ва барқарор тинчлик учун. Инсон сифатида, фуқаро сифатида, ота сифатида. Мен ҳеч нарсага ёпишиб олмайман. Мен Украина президентиман, чунки менга 73 фоиз одам овоз берган ва бугун мен Украина президентиман, чунки мени мамлакатимдаги кўпчилик қўллаб-қувватламоқда”, деди у.
Зеленский тинчлик шартномасини имзолаш учун “фақат Зеленский иштирокисиз” талаби қўйилса, лавозимини тарк этишга тайёрми, деган саволга шундай жавоб берди. Сиёсатчининг таъкидлашича, Россия ундан уруш бошидагидек жисмонан эмас, балки сиёсий йўл билан қутулмоқчи.
“Буни тушунса бўлади. Мен Путин учун жуда ноқулай одамман”, деди Украина раҳбари. Зеленский “уруш пайтида президент қилиши лозим бўлган ишни” бажараётганини қайд этди.
АҚШ Украинада президентлик ва парламент сайловларини 2025 йил охиригача ўтказишни хоҳламоқда, айниқса тинчлик келишувига эришилса. Украинада навбатдаги президентлик сайлови 2024 йил 31 март куни ўтказилиши керак эди. Мамлакатдаги ҳарбий ҳолат туфайли улар ўтказилмади. Украина Конституцияси ҳарбий ҳолат пайтида президентлик сайловларини ўтказишни тўғридан тўғри тақиқламайди. Бироқ бундай тақиқ “Ҳарбий ҳолатнинг ҳуқуқий режими тўғрисида”ги қонун даражасида белгиланган.
Россия президенти Владимир Путин бир неча бор музокаралар “қонунийлигини йўқотган” Украина давлат раҳбари билан ўтказилмаслигини даъво қилганди. Чунки Путиннинг фикрича, Зеленский “ноқонунийлиги туфайли ҳеч нарса имзолашга ҳақли эмас”.
АҚШ сайлов ўтказишга чақирди, Украина жавоб қайтарди
АҚШ махсус вакили Кит Келлогган Украинада 2025 йил охиригача парламент ва президентлик сайловларини ўтказишга чақирганди. Украина президентининг коммуникациялар бўйича маслаҳатчиси Дмитрий Литвин буни рад этди. У бу йўл билан Путинни қўрқитиб бўлмаслигини таъкидлади.
Режаси фақат ўт очишни тўхтатиш ва сайлов бўлса, бу муваффақиятсиз режа — Путинни фақат шу икки нарса билан қўрқитиб бўлмайди, деди у.
Литвиннинг сўзларига кўра, Москва “ракета ва ўқ-дорилар ишлаб чиқаришни кўпайтиришда, санкцияларни четлаб ўтишнинг янги усулларини топишда ва нефтдан пул ишлашда давом этмоқда.
Шубҳасиз, бу қуролларнинг барчаси демократик қўшниларни ҳурмат қилиш учун яратилмаган. Россиянинг Шимолий Корея билан ҳарбий иттифоқи ўт очишни тўхтатишни ҳурмат қилиши билан боғлиқ эмас. Шунинг учун биз, албатта, асосий ҳамкорларнинг расмий вакиллари томонидан чуқурроқ ёндашувни кўришни афзал кўрамиз, деди Зеленскийни маслаҳатчиси.
Ctrl
Enter
Хато топдИнгизми
Иборани ажратиб Ctrl+Enter тугмасини босингМавзуга оид янгиликлар
