Трамп: Украинадаги урушни бир неча ҳафта ичида тугатишимиз мумкин

^{Фото: Getty Images}
АҚШ президенти Доналд Трамп Россия—Украина уруши бир неча ҳафта ичида тугатилишига умид қилмоқда. Бу ҳақда у Оқ уйда Франция президенти Эммануэл Макрон билан бирга иштирок этган матбуот анжуманида маълум қилди.

«Ўйлайманки, бунга бир неча ҳафта ичида якун ясашимиз мумкин. Агар биз ақлли бўлсак. Ақлли бўлмасак, бу давом этади ва ўлиши керак бўлмаган ёш, кўркам одамларимизни йўқотишни давом этамиз. Биз эса буни хоҳламаймиз», — дейди Трамп.

АҚШ президенти, шунингдек, можаронинг кучайишига ва учинчи жаҳон урушининг бошланишига йўл қўймоқчи эмаслигини таъкидлади.

«Бу билан мустақил шуғулланилмаса, учинчи жарҳон урушига олиб келиши мумкин. Шундай вақт келадики, уруш ушбу икки давлат билан чекланмайди. Унга бошқа давлатлар ҳам жалб қилинади. Ва бу ҳақиқатда жуда катта урушга — учинчи жаҳон урушига олиб келиши мумкин. Биз бунга йўл қўймаймиз», — дея қайд этади Трамп.

Шунингдек, Трамп яқин икки ҳафта ичида табиий ресурслар бўйича битимни имзолаш мақсадида Володимир Зеленский билан учрашиш ниятида эканини маълум қилди.

«У битимни имзолаш учун шу ёки кейинги ҳафта келиши мумкин ва бу жуда яхши бўларди. У билан Овал кабинетда бажонудил учрашган бўлардим», — дейди Трамп. АҚШ президентининг таъкидлашича, Қўшма Штатлар ва Украина нодир металлар «ва бошқа масалаларда» «якуний келишувга эришишга жуда яқин» турибди.

Оқ уй матбуот котиби Кэролайн Ливитт 22 феврал куни Доналд Трамп Россия ва Украина ўртасидаги урушни «шу ҳафтада» тугатишга ишонаётганини маълум қилганди. Украина президенти Володимир Зеленский Россиянинг кенг кўламли босқинининг уч йиллиги арафасида ўтказилган матбуот анжуманида Россия билан урушни «шу ҳафта тугатиб бўлмаслигини» билдирди. “Замин” янгиликларини “Telegram”да кузатиб боринг