Путин АҚШ билан металл ресурслари бўйича ҳамкорлик қилишга тайёр

Россия президенти Владимир Путин АҚШ билан нодир ер металларини қазиб олиш ва алюминий ишлаб чиқариш соҳасида ҳамкорлик қилиш имконияти борлигини билдирди. Унинг сўзларига кўра, Красноярск ўлкасида гидроэлектростанция қуриш ва алюминий ишлаб чиқариш корхоналарини ташкил этиш режаси мавжуд.

"Биз Америка компаниялар билан ушбу йўналишда ҳамкорлик қилиш ҳақида ўйлашимиз мумкин. Масалан, Красноярск ўлкасида совет даврида янги гидроэлектр станцияси қуриш ва қўшимча алюминий ишлаб чиқариш корхоналарини ташкил этиш режалари мавжуд эди", деди Путин.

У бу лойиҳа “инвестицион салоҳиятга эга” бўлиши мумкинлигини таъкидлади.

"Дастлабки ҳисоб-китобларга кўра, у бугунги нархларда тахминан 15 миллиард долларга баҳоланиши мумкин. Лекин биз бу ҳақда ўйлаб кўришимиз керак", деди Россия раҳбари.

Россия ҳудудидаги нодир ер металлари ҳақида гапирар экан, Путин бугунги кунда мамлакат уларни ўзлаштириш учун етарлича иш қилмаётганини айтди.

"Нодир ер металлари — замонавий иқтисодиёт тармоқлари учун жуда муҳим компонент, ғоят муҳим ресурслардир. Биз ҳозирча бу йўналишда кам иш қиляпмиз", деди Путин.

АҚШ Украина ресурсларидан фойдаланишни хоҳламоқда

Вашингтон Украинада қимматбаҳо минералларни қазиб олиш бўйича келишув имзолашни таклиф қилган, аммо президент Владимир Зеленский ҳужжатни имзолашдан бош тортди. Унга кўра, келишувда Украина манфаатларини акс эттирмайдиган жиҳатлар бор.

Трамп маъмурияти Украинага нодавлат ресурсларнинг 50% ни АҚШга беришни таклиф қилган, аммо бу ҳали муҳокама жараёнида. Зеленскийнинг маслаҳатчилари уни битимни имзолашга чақиришган, бироқ президент «украиналикларнинг 10 авлоди тўлайдиган ҳужжатни» тасдиқлашдан бош тортган.

Россия ва АҚШ ўртасидаги минерал ресурслар бўйича ҳамкорлик масаласи ҳали муҳокама жараёнида. Путин Россияда АҚШ манфаатдор бўлган металлар етарлича кўп эканини таъкидлади. Шу билан бирга, Украина ўз ресурслари бўйича келишувни ҳозирча имзолашни маъқул кўрмаяпти. “Замин” янгиликларини “Telegram”да кузатиб боринг