24 феврал куни АҚШ президенти Доналд Трамп Оқ уйда Франция президенти Эммануэл Макронни қабул қилди. Ангела Меркел кетганидан кейин Европада айнан Макрон етакчиликни қўлга олган. АҚШ уруш музокараларида Европани очиқчасига чеккага чиқариб қўйган бир вақтда Вашингтондаги бу учрашув айниқса аҳамиятли бўлди.
Учрашув давомида Доналд Трамп бир қатор баёнотлар берди. Хусусан, Украина президенти Зеленский минерал ресурслар тўғрисидаги келишувни имзолашини айтди: «Зеленский шу ҳафта ёки келаси ҳафта келиши мумкин. Мен уни жон деб овал кабинетда кутиб олган бўлардим», деди Трамп. Унинг сўзларига кўра, Вашингтон ва Киев минерал ресурслар, шунингдек, бошқа масалалар бўйича келишувга эришишга яқин.
Трамп томонлар ресурслар бўйича келишув устида ишлаётганини айтди. Афтидан, Зеленский АҚШ молия вазири олиб борган биринчи келишувни имзоламаслигини айтгандан кейин АҚШ ва Украина уни юмшатиш устида ишлаётган кўринади.
Трамп навбатдаги марта урушда ёш, чиройли одамлар ўлаётгани, уни тўхтатиш кераклигини таъкидлади. «Менимча, урушни бир неча ҳафтада тугата оламиз, агар ақлли бўлсак. Ақлли бўлмасак, барчаси давом этади, биз ёш, чиройли одамларни йўқотаверамиз. Улар ўлмаслиги керак, биз буни истамаймиз», деди АҚШ президенти Макрон билан учрашув вақтида. «Мен эскалация давом этишига ва учинчи жаҳон уруши бошланишига йўл қўймайман», деб қўшимча қилди республикачи.
Кўпчилик Трамп урушни тугатиш бўйича янги муддат – «ушбу ҳафтада» дейишга одатланганига эътибор қаратди. Худди сайлов кампанияси вақтида урушни бир кунда тугатаман дегани каби. Журналистлар бу борада Киев ва Москвадан изоҳ сўрашди. Кремлда бу масалада Оқ уйдагилар тушунтириш бериши маъқуллигини айтишди. Зеленский эса 23 феврал куни уруш аниқ бу ҳафта тугамаслигини айтганди.
Макрон нималар деди?
Трамп Украинадаги уруш музокараларини фаол бошлаб, очиқчасига Россияга ёқадиган позиция эгаллаганидан кейин Макрон бошчилик европаликлар Украинага бундан кейин ҳам АҚШдан мустақил тарзда ёрдам беришда давом этиш бўйича келишиб олганди. Трамп Зеленскийга таҳдид қила бошлагач, Макрон Европа лидерларини фавқулодда учрашувга чақириб, қитъадаги хавфсизлик масалаларини муҳокама қилганди.
Макрон Трамп билан учрашувни яхши баҳолади, АҚШ президенти урушни тугатишга киришганини олқишлади, лекин унинг гапларидан Трампнинг охирги вақтдаги риторикасига қарши экани сезилиб турди. Масалан, Макрон «музокаралар вақтида эҳтиёт бўлиш кераклигини» айтди. «Украина уч йил жуда қийин кунларни бошдан кечирди. Улар ўз ҳудуди ва суверенитетини ҳимоя қилмоқда. Биз тинчлик хоҳлаймиз. Президент Трампнинг ташаббуслари ижобий. Лекин музокаралар вақтида эҳтиёт бўлиш лозим, биз Украинага аниқ нимадир беришимиз керак», деди Макрон.
Шунингдек, Макрон ваъда қилганидек Франция ва Буюк Британия Украинага тинчлик кафолати беришга тайёрлиги ҳақидаги режани Трампга тақдим этган. «Биз Украина учун хавфсизлик кафолатлари режасини ишлаб чиқдик. Бунда иш ҳарбийларни юборишгача бориши мумкин, улар фронт чизиғига бориши ҳам шарт эмас, шунчаки кафолат ўлароқ юборилади», деди Макрон.
«9 май – жуда эрта»
Бир неча кун аввал АҚШ президенти 9 май куни ғалаба парадида Москвага бораркан, ўша ерда Путин Трамп иштирокида Россия Украина устидан ғалаба қозонгани ҳақида эълон қиларкан деган хабарлар чиққанди. Трамп бу гапларни ўша куннинг ўзидаёқ рад қилганди. Ундан Макрон билан учрашув вақтида ҳам шу ҳақда сўрашди. «Москвага ҳаммаси жойига тушганда бораман. 9 май – жуда эрта», деди Трамп.
АҚШ президентидан тинчлик келишувида Украина ўз ерларидан воз кечиши қайд этиладими, деб сўрашди. Трамп бу ҳозирча маълум эмаслиги, лекин Украина бир қисм ерларини қайтаришига умид қилишини айтди.
Ўткир Жалолхонов тайёрлади.
Ctrl
Enter
Хато топдИнгизми
Иборани ажратиб Ctrl+Enter тугмасини босингМавзуга оид янгиликлар
