21:44 / 27.02.2025

Ҳарбий соҳага энг кўп маблағ сарфлайдиган мамлакатлар

^{Фото: Sgt. Thiem Huynh/U.S. Army}
АҚШ президентлигига Доналд Трамп келгач мудофаа харажатларини қисқартириш ташаббуси билан чиқа бошлади. Хусусан у Украина ва Ғазо секторидаги уруш тугаши билан Россия ҳамда Хитой билан мудофаа харажатларини қисқартириш бўйича музокаралар ўтказиш ниятида эканини маълум қилди.

Шунингдек, Трамп Россия ва Хитой билан ядровий қуроллар сонини камайтириш мавзусидаги музокараларни ҳам қайта тикламоқчи. Хўш, дунё мамлакатлари ҳарбий соҳага қанча пул сарфлайди?

Al Jazeera’нинг Стокҳолм халқаро тинчлик тадқиқот институти (SIPRI) таҳлилларига таяниб ёзишича, 2023 йилда глобал ҳарбий харажатлари 6,8 фоизга кўпайиб, 2,44 триллион долларгача ошган. Бу киши бошига 306 долларни ташкил этади.

Таққослаш учун, 2000 йилда жаҳон ҳарбий харажатлари 798 миллиард доллар ёки аҳоли жон бошига 130 доллар бўлган. Ўтган 23 йил мобайнида ҳарбий соҳага ажратилаётган пул 3 баробардан кўпроққа ошган.

Ҳарбий бюджети энг катта бўлган мамлакатлар

АҚШ – ҳарбий соҳага энг кўп маблағ сарфлайдиган давлатдир. SIPRI маълумотларига кўра, 2023 йилда Қўшма Штатларнинг мудофаа бюджети 880 миллиард долларни ташкил этган. Бу кейинги ўринлардаги саккизта давлатнинг умумий харажатларидан ҳам кўпроқ.

Шунингдек, Хитой (309 миллиард доллар), Россия (126 миллиард доллар), Ҳиндистон (83 миллиард доллар) ва Саудия Арабистони (74 миллиард доллар) каби давлатларнинг ҳам мудофаа бюджети анча катта ҳисобланди.

Ҳарбий харажатлар ялпи ички маҳсулотга нисбатан олинганда, энг юқори кўрсаткич Украинада – 36,7 фоиз. Бу борада ЯИМнинг 8,9 фоизини сарфлаган Ливан иккинчи, Жазоир (8,2 фоиз), Саудия Арабистони (7,1 фоиз) ва Жанубий Судан (6,3 фоиз) эса кейинги ўринларни банд қилган.