Трамп Зеленскийни Оқ уйдан ҳайдади: музокара натижалари

АҚШ ва Украина ўртасида фойдали қазилмалар бўйича битим имзоланиши кутилган музокаралар жуда кескин тарзда якун топди. Доналд Трамп ва Володимир Зеленский ўртасидаги учрашув мунозаралар ва тортишувларга бой бўлиб, натижада нафақат битим бекор қилинди, балки томонлар ўртасида жиддий келишмовчилик юзага чиқди.

Трамп Украина муаммоларига ишора қилди

Учрашув давомида Трамп Зеленскийга урушни тинч йўл билан ҳал этиш зарурлигини айтиб, "агар ўт очишни тўхтатишга эришиш мумкин бўлса, бу имкониятни қўлдан бой бермаслик керак", деб таъкидлади.

Президент Трампнинг фикрига кўра, АҚШ ҳарбий ёрдамисиз Украина урушни икки ҳафта ичида йўқотиши мумкин. Шу боис у Зеленскийни тинчлик шартномасига рози бўлишга чақирди.

Трамп шундай деди: "Мен биламанки, сиз ғалаба қозонаётганингиз йўқ. Украина ҳозир катта муаммоларга дуч келмоқда ва ўзини оғир аҳволга солиб қўйди."

Трамп ва Вэнс Зеленскийни АҚШга нисбатан ҳурматсизликда айблади

Учрашувда АҚШ вице-президенти Жей Ди Вэнс ҳам иштирок этди. У Зеленскийни АҚШ ёрдамидан миннатдор бўлиш кераклигини таъкидлади.

Зеленский эса бу айбловларга "Мен АҚШга бир неча марта миннатдорчилик билдирганман!" деб жавоб қайтарди ва кескин гапириб юборди.

Вэнс эса бунинг жавобида шундай деди:

"Сиз ҳозир ҳарбийларингизни фронтга мажбурий жўнатяпсиз, чунки сизда кадрлар муаммоси бор. АҚШ президенти урушни тугатиш учун ҳаракат қиляпти, сиз эса бунга қаршилик қиляпсиз!"

Трамп эса Зеленскийни танқид қилиб, Украина ва АҚШ ўртасидаги муносабатларга зарар етказаётганини таъкидлади.

"Сизнинг бу қилганингиз мамлакатимизга нисбатан ҳурматсизлик. Сиз миллионлаб одамларнинг ҳаёти билан ўйнаяпсиз ва Учинчи жаҳон уруши хавфини келтириб чиқаряпсиз!"

Трамп: "Зеленский тинчликка тайёр эмас"

Учрашув якунида Трамп Зеленскийнинг тинчликка тайёр эмаслигини таъкидлаб, Truth Social ижтимоий тармоғида шундай ёзди:

"Ажабланарли ҳолат. Мен Зеленскийнинг Америка иштирок этган тақдирда тинчликка тайёр эмаслигини тушундим, чунки у бизнинг иштирокимиз унга музокараларда устунлик беради, деб ўйлайди. Мен устунлик эмас, ТИНЧЛИКни хоҳлайман."

Шунингдек, Трамп Зеленскийга "тинчликка тайёр бўлганида қайтиши мумкин" эканлигини маълум қилди.

Зеленский музокаралардан сўнг Оқ уйдан кетди

Fox News маълумотига кўра, Зеленский Оқ уйни режалаштирилган вақтдан аввал тарк этган. Айрим манбаларга кўра, Трамп Зеленскийни музокаралардан сўнг Оқ уйдан чиқиб кетишга мажбур қилган.

Германиянинг BILD нашри эса шундай ёзди: "Трамп Зеленскийни Оқ уйдан ҳайдади."

Музокаралар натижасида Украина ва АҚШ ўртасида фойдали қазилмалар бўйича келишув бекор қилинди. CNN маълумотига кўра, украин делегацияси Вашингтондан музокараларга қайтишни сўраган, бироқ Трамп маъмурияти бу таклифни рад этган.

Жаҳон ҳамжамиятининг муносабати

Учрашувдан сўнг дунё сиёсатчилари ва оммавий ахборот воситалари кескин муносабат билдирди:

📌 NBC: "Зеленский ва Трамп учрашуви дипломатик тўқнашувга айланди."
📌 AP: "Оқ уйдаги музокаралар томонлар ўртасида очиқ душманлик даражасига етди."
📌 Telegraph: "Бу дипломатик фалокат бўлди."
📌 WSJ: "Трамп ва Зеленский ўртасидаги муносабатлар жиддий таранглашди."
📌 NYT: "Зеленский Трампни юмшатиш ўрнига уни ғазаблантириб қўйди."

Шунингдек, Украина элчиси Оксана Маркарова музокаралар пайтидаги тортишув вақтида шок ҳолатига тушгани тасвирланган.

Илон Маск: "Зеленский ўзини Америка халқи кўз ўнгида яксон қилди"

Tesla ва SpaceX раҳбари Илон Маск Зеленскийни танқид қилиб, "у ўзини Америка халқининг кўз ўнгида маҳв қилди" деб баҳо берди.

Украина ва АҚШ муносабатларида жиддий инқироз

Трамп ва Зеленский ўртасидаги кескин музокаралардан сўнг Украина ва АҚШ муносабатлари жиддий синовга дуч келди.

⚠️ Трамп Зеленскийни тинчликка тайёр эмасликда айблади.
⚠️ Фойдали қазилмалар бўйича келишув бекор қилинди.
⚠️ Зеленский Оқ уйдан ҳайдалди.

Айни пайтда Вашингтон Киев билан муносабатларни қайта кўриб чиқиши мумкин. Сиз бу вазият ҳақида нима деб ўйлайсиз? “Замин” янгиликларини “Telegram”да кузатиб боринг