Фото: Brian Snyder / Reuters
Олаф Шолц Украина Германия ва Европага ишониши мумкинлигини айтди. Германия канцлери Доналд Трампнинг Киев АҚШ билан ресурслар бўйича келишув имзоламаса, уни қўллаб-қувватлашдан воз кечиш ҳақидаги таҳдидига шундай жавоб берди.
Германия канцлери Олаф Шолц 28 феврал, жума куни кечқурун АҚШ президенти Доналд Трамп билан Вашингтондаги учрашув чоғида юзага келган жанжал ортидан Украина ва унинг президенти Володимир Зеленскийни қўллаб-қувватлашини билдирди.
«Ҳеч ким украиналиклардан кўра кўпроқ тинчликни хоҳламайди. Шунинг учун биз доимий ва адолатли тинчликка эришиш учун умумий йўлда ишлаяпмиз. Украина Германияга — ва Европага таяниши мумкин», деб ёзган X ижтимоий тармоғида Шолц. Бу унинг Трампнинг Киев нодир металлар бўйича келишув имзоламаса, уни қўллаб-қувватлашдан воз кечиш таҳдидига жавоби бўлди.
Германия ташқи ишлар вазири Анналена Бербок ҳам Украина «ёлғиз эмас» ва «Германия, Европа ва бошқа мамлакатларнинг собит қўллаб-қувватлашига ишониши мумкинлиги»ни таъкидлади.
Бундестаг сайловларида ғалаба қозонган консерватив ХДИ/ХСИ блоки етакчиси ва Германиянинг бўлажак канцлери Фридрих Мерц ўз навбатида шундай деб ёзди: "Ҳурматли Володимир Зеленский, биз Украинани яхши кунларда ҳам, оғир дамларда ҳам қўллаб-қувватлаймиз".
«АҚШ маъмуриятининг хатти-ҳаракати Европа ўз келажагини ўз қўлига олиши кераклигини яна бир бор кўрсатмоқда. Биз биргаликда барча даражаларда кучлироқ бўлишимиз керак. Германия олдинга интилиши керак. Жумладан, Украинага ёрдам бериш учун ҳам», — дейди Германия Социал-демократик партияси ҳамраиси Ларс Клингбайл.
Европалик сиёсатчиларнинг Оқ уйдаги можарога муносабати
«Украина — Европа! Биз Украина ёнидамиз. Биз Украинани босқинчига қаршилик кўрсатишда давом этиши учун қўллаб-қувватлашни кучайтирамиз. Бугун эркин дунёга янги етакчи кераклиги маълум бўлди. Биз, европаликлар, бу чақириқни қабул қилишимиз керак», деб ёзди Европа Иттифоқи дипломатияси раҳбари Кая Каллас X ижтимоий тармоғида.
«Сизнинг иродангиз Украина халқининг жасорати учун берилган баҳодир. Кучли, жасур, қўрқмас бўлинг. Сиз ҳеч қачон ёлғиз қолмайсиз, муҳтарам президент Зеленский. Биз сиз билан адолатли ва мустаҳкам тинчлик учун ишлашда давом этамиз», — деди Еврокомиссия раҳбари Урсула фон дер Ляйен.
«Агрессор бор: Россия. Қурбон бор: Украина», деб ёзган Франция президенти Эммануэл Макрон ўзининг X микроблогида. «Биз уч йил олдин Украинага ёрдам берганимиз ва Россияга қарши санкциялар қўйганимиз тўғри эди ва биз буни давом эттирмоқдамиз. Биз америкаликлар, европаликлар, канадаликлар, японияликлар ва бошқалар. Улар ёрдам берган ва курашни давом эттираётган барчага раҳмат. Мустақиллик, уларнинг фарзандлари ва Европа хавфсизлиги учун».
«Ҳурматли Володимир Зеленский, азиз украиналик дўстлар, сиз ёлғиз эмассиз», — деди Полша бош вазири Доналд Туск Вашингтондаги музокаралардан сўнг.
Испания бош вазири Педро Санчес ижтимоий тармоқда: «Украина, Испания сен билан» деб ёзди.
Италия бош вазири Жоржа Мелони АҚШ ва Европа давлатлари ўртасида саммит ўтказишга чақирди. «Ғарбнинг ҳар қандай бўлиниши барчамизни заифлаштиради ва цивилизациямизнинг таназзулга учрашини кўрмоқчи бўлганларга ёрдам беради», — дейилади баёнотда.
Буюк Британия бош вазири Кир Стармернинг матбуот хизмати у 28 феврал куни «президент Трамп ва президент Зеленский билан гаплашганини» айтди. Стармер «Украинанинг ёнида туришда давом этмоқда ва унинг суверенитети ва хавфсизлигига асосланган барқарор тинчлик йўлини топиш учун қўлидан келган барча ишни қилмоқда», дея маълум қилди Даунинг-стрит ва шундай қўшимча қилинди: «Бош вазир якшанба кунги дунё етакчилари, шу жумладан президент Зеленский билан учрашувини интиқлик билан кутмоқда».
«Кучли одамлар тинчлик ўрнатадилар, кучсизлар уруш бошлайдилар. Бугун президент Доналд Трамп кўпчилик учун буни қабул қилиш қийин бўлса-да, дадиллик билан тинчлик тарафдори бўлди. Раҳмат, жаноб президент!» – деб ёзди Венгрия бош вазири Виктор Орбан ўз блогида.
Белгия бош вазири Барт де Вевер, Австриянинг собиқ канцлери Карл Нехаммер, Дания бош вазири Метте Фредериксон, Чехия бош вазири Петр Павел, Хорватия бош вазири Андрей Пленкович, Финландия бош вазири Петтери Орпо, Латвия президенти Эдгарс Ринкевич, Нидерландия бош вазири Дик Шофф, Австралия бош вазири Энтони Албаниз, Люксембург бош вазири Люк Фриден, Канада бош вазири Жастин Трюдо ва бошқа кўплаб сиёсатчилар ҳам Володимир Зеленский ва Украина халқини қўллаб-қувватлашини билдирдилар.
Ctrl
Enter
Хато топдИнгизми
Иборани ажратиб Ctrl+Enter тугмасини босингМавзуга оид янгиликлар
