Оқ уйдаги можародан сўнг АҚШ сиёсатчиларининг фикри иккига бўлинди

^{Фото: Saul Loeb/AFP/Getty Images}
28 феврал, жума куни Вашингтонда АҚШ президенти Доналд Трамп ва унинг украиналик ҳамкасби Володимир Зеленский ўртасидаги музокаралар нодир металлар бўйича келишув имзолаш ўрнига жанжал билан якунланди. АҚШ Сенати аъзолари ва бошқа америкалик сиёсатчилар ўртасида бу борадаги фикрлар, асосан, партиялар бўйича иккига бўлинди.

Республикачилар: "Америка ҳаммасидан устун" тамойили амалда

Вакиллар палатаси спикери Майк Жонсон шундай деди: «Бугун биз Овал кабинетда Американи биринчи ўринга қўядиган Америка президентини кўрдик». «Америкадан фойдаланиш ва ҳурматсизлик қилиш мумкин бўлган кунлар ўтди», деди у.

Нуфузли республикачи сенатор Линдси Грем журналистларга: «Овал кабинетда кўрганларим ҳурматсизлик эди ва биз Зеленский билан яна учрашамизми ёки йўқми, билмайман» деди. Унинг фикрича, Украина президенти ё «ўзгариши» ёки «истеъфога чиқиб, Вашингтон «ишлай оладиган» одамни юбориши керак».

Украина ССРда туғилган ва ҳозирда АҚШ Сенатида Индиана штати вакили бўлган Виктория Спарц Зеленский «АҚШ президенти ва Америка халқини ҳақорат қилиб, Украина халқига катта зарар етказди» деган фикрни билдирди. «Бу театр саҳнаси эмас, балки ҳақиқий уруш», деди республикачи.

Шу партиядан конгрессмен Дон Бекон эса бошқа позицияни эгаллади. «Баъзилар ҳақиқатни яширишни истайди, лекин биз буни эътиборсиз қолдира олмаймиз. Бу урушда Россия айбдор», — дейди республикачи.

АҚШ демократлари: Москва ҳозир байрамни нишонламоқда

«Кремлда байрам нишонланяпти», деди Мериленд штатидан Сенат аъзоси Крис Ван Холлен музокаралар якунларини шарҳлар экан. Унинг сўзларига кўра, Трамп ва АҚШ вице-президенти Жей Ди Вэнснинг «Зеленскийни ҳақорат қилгани ва ёлғон ва дезинформацияга тўла шоу кўрсатиши» «ҳатто Путиннинг ҳам ҳижолат бўлишига олиб келади» ва «Америка учун шармандалик» бўлди.

«Биз Трампга тарихни қайта ёзишга ёки ўнлаб йиллик ҳамкорликни (Украина билан) йўқ қилишга рухсат бера олмаймиз», — деди Сенатдаги демократлар етакчиси Дик Дурбин. У Зеленскийдан «самимий кечирим сўрашини» билдирди.

Массачусетс штатидан демократ сенатор Элизабет Уорреннинг айтишича, АҚШнинг амалдаги президенти «демократиянинг йўқ қилинишини сиёсий томоша сифатида кўриб, Украинани бўриларга ташламоқда ва Путинга яхшилик қилмоқда».

Обама маъмуриятида миллий хавфсизлик бўйича маслаҳатчи ўринбосари бўлиб ишлаган яна бир демократ Бен Родс шундай деди: «Трамп Қўшма Штатларни ўта ўнг, авторитар, қадрсиз олигархияга айлантирмоқда, бу дунё автократиялари билан чамбарчас боғлиқ». “Замин” янгиликларини “Telegram”да кузатиб боринг