АҚШ президенти Дональд Трамп Украина раҳбари Владимир Зеленскийни Қўшма Штатлардан келаётган ёрдамни муносиб баҳоламаганликда айблади. Трампнинг таъкидлашича, Зеленский АҚШдан келаётган маблағларни ҳеч қандай миннатдорликсиз, осонлик билан қабул қилмоқда.
Трампнинг бу баёноти икки давлат раҳбарлари ўртасидаги кескин тортишувдан бир ҳафта ўтиб янгради. У айниқса, Байден маъмуриятининг Украинага миллиардлаб долларлик ҳарбий ёрдам кўрсатганини танқид қилди.
"Зеленский шунчаки боладан конфет тортиб олгандек, АҚШдан маблағларни олади. У ақлли ва кучли инсон, лекин у Байден даврида Қўшма Штатлардан пулни худди бир бола ширинликни тортиб олгандек, осонлик билан олди", – деди Трамп.
Шунингдек, Трамп Қўшма Штатлар Украинага 350 миллиард доллар ёрдам берганини таъкидлар экан, Зеленский бу ёрдам учун ҳамон етарлича миннатдорлик билдирмаётганини қайд этди. У, шунингдек, АҚШ раҳбарлари орасида Россияга нисбатан энг қаттиқ чораларни айнан ўзи қўллаганини таъкидлади.
"Мен Россиянинг нефть қувурларини тўхтатдим, санкциялар жорий қилдим, Украинага Javelin ракеталарини бердим, лекин шу билан бирга Путин билан муносабатларим яхши эди. Ҳеч ким Россияга мендан кўра қаттиқроқ муносабатда бўлмаган", – деди Трамп.
Трампнинг ушбу баёнотлари унинг аввалги фикрларини янада кучайтириб, унинг Украинага нисбатан позициясига шубҳа уйғотмоқда. У аввалроқ ҳам АҚШнинг Украинага ёрдами борасида кескин фикрлар билдириб, Зеленскийни "диктатор" деб атаган эди. Трампнинг бу гаплари унинг Москва томонида экани ҳақидаги тахминларни янада мустаҳкамламоқда.
Ctrl
Enter
Хато топдИнгизми
Иборани ажратиб Ctrl+Enter тугмасини босингМавзуга оид янгиликлар
