Америка расмийларининг фикрига кўра, Трамп асосий музокарачи ҳисобланади
АҚШ президенти Доналд Трамп Владимир Зеленскийга Вашингтон Украинадаги можарони узоқ муддатли тинч йўл билан ҳал қилишга интилаётганини аниқ тушунтирди. Бу ҳақда Fox News телеканалига берган интервьюсида Оқ уй матбуот котиби Кэролайн Ливетт маълум қилди.
Унинг сўзларига кўра, Америка раҳбари украин президенти билан суҳбатда ўз позициясини очиқ баён этган.
Ливетт шундай таъкидлади: «Трамп Зеленскийга АҚШ узоқ муддатли тинчлик келишувини имзолашга жиддий ёндашишини тушунтирди. Биз бугун Украина томони билан ўтказилган музокаралардан жуда мамнунмиз ва эришилган келишувлар мустаҳкам бўлишига умид қиламиз».
Ливетт шунингдек, Москва музокараларда муҳокама қилинган масалаларга қандай муносабат билдиргани ҳақида ҳозирча маълумот йўқлигини билдирди.
Унинг айтишича, АҚШ давлат котиби Марко Рубио ва президентнинг миллий хавфсизлик бўйича маслаҳатчиси Майк Уолтц ушбу масала устида фаол иш олиб бормоқда.
«Президент жараёнга тўлиқ жалб қилинган. У кун давомида Саудия Арабистонидаги вазиятнинг ривожланиши бўйича янгиланган маълумотларни олди», — деб қўшимча қилди расмий вакил.
АҚШ ва Украина вакиллари ўртасидаги музокаралар Жидда шаҳрида бўлиб ўтди ва тахминан етти соат давом этди. Бу Зеленский ва Трамп ўртасида февраль ойи охирида юзага келган кескин баҳсдан сўнг, икки давлат вакилларининг биринчи юқори даражадаги учрашуви бўлди.
The New York Times газетаси Украина делегациясидаги манбасига таяниб хабар беришича, ушбу музокаралардан олдин Франция ва Буюк Британия вакиллари Киевга АҚШ билан ўзаро ҳамкорлик бўйича кўрсатмалар берган.
Учрашув Жиддадаги Ritz-Carlton меҳмонхонасида бўлиб ўтди. Украина томонидан унда президент маъмурияти раҳбари Андрей Ермак, унинг ўринбосари Павел Палиса, ташқи ишлар вазири Андрей Сибига ва мудофаа вазири Рустем Умеров иштирок этди.
Владимир Зеленский Саудия Арабистонига ташриф буюрган бўлса-да, музокараларда қатнашмади.
Ctrl
Enter
Хато топдИнгизми
Иборани ажратиб Ctrl+Enter тугмасини босингМавзуга оид янгиликлар
