БМТ судьяси, шу билан бир вақтда, Уганда Олий суди судьяси ҳисобланган 49 ёшли Лидия Мугамбе ўз ҳамюртини Буюк Британияга алдаб чақириб, ҳужжатларини олиб қўйган ҳамда уй ишлари ва бола парваришига мажбурлаган, деб ёзади Дарё нашри.
Лидия Мугамбе
Фото: Уганда Суд идоралари
Буюк Британия суди уни иммиграция қонунчилигини бузиш, инсон меҳнатини эксплуатация қилиш ҳамда гувоҳни қўрқитиш кабиларда айбдор деб топди. Мугамбе бу ишларни Оксфорд университетида ҳуқуқ бўйича докторантура даражаси учун ўқиётган бир вақтда амалга оширган.
У ҳибсга олиш пайти Темза полициясига қаршилик кўрсатиб, дипломатик иммунитетга эгалигини айтган. Бу гаплар боди-камера объективига муҳрланиб қолган.
“Мен ўз мамлакатимда судьяман, мен иммунитетга эгаман. Мен жиноятчи эмасман. Менинг дипломатик паспортим бор”, деган у.
Суд жараёнидан тафсилотлар
Мазкур иш бўйича прокурор Каролин Ҳаугҳей КC суд залида туриб, “Лидия Мугамбе жабрланувчи меҳнатини эксплуатация қилгани ҳамда унинг ўз ҳуқуқларидан бехабар эканидан фойдаланганини айтди. Суд ҳайъати прокурорнинг даъвосини қўллаб-қувватлади.
Суд ҳужжатларида келтирилишича, Мугамбе жабрланувчини Британияга “ўз ҳаётини осонлаштириш ва энг арзон йўл билан хизматкор топиш мақсадида” олиб келган.
“Мугамбе ёш аёлни фақат шахсий қулайлиги учун олиб келиб, ёмон муомала қилган. Қонунларни яхши била туриб, нафақат жабрланувчига, балки унинг хавфсизлигини таъминламоқчи бўлган полицияни ҳам алдашдан тап тортмаган”, деди прокурор Ҳаугҳей қўшимча қилиб.
БМТ расмий маълумотларига кўра, Мугамбе 2023 йил май ойида ташкилотнинг судьялар рўйхатига киритилган. Бироқ бу пайтга келиб, унга нисбатан тергов аллақачон бошланган эди.
Гап шундаки, полиция унинг уйига мазкур воқеадан уч ой олдин келган. Бу эса Мугамбенинг тайинлови вақтида ушбу жиноят иши эътиборга олинмагани ёки текширилмай қолиб кетган бўлиши мумкинлигидан далолат қилади.
Суд унга нисбатан ҳукмни 2 май куни чиқаради.
Ctrl
Enter
Хато топдИнгизми
Иборани ажратиб Ctrl+Enter тугмасини босингМавзуга оид янгиликлар
