Исроил бош вазири Бинямин Нетаняҳу ҳукумати ҲАМАСга қарши ҳарбий ҳаракатларни тўхтатмасдан, музокараларни давом эттиришини маълум қилди. Унинг таъкидлашича, Исроил ўз уруш мақсадларига эришиш ҳамда Ғазо ҳудудининг таҳдид туғдирмаслигини таъминлаш учун кураш олиб боради.
ҲАМАС билан музокаралар ва урушнинг давом этиши
Нетаняҳу Исроилнинг Ғазо секторига йўллаган зарбалари «фақат бошланиши» эканини ва бу ҳаракатлар гаровга олинганларни озод қилиш учун зарурлигини таъкидлади. Унга кўра, эндиликда ҲАМАС билан ҳар қандай музокаралар фақат жанговар ҳаракатлар давом этаётган ҳолда амалга оширилади.
«Мен бир неча марта таъкидладим: агар ҲАМАС рад этиш сиёсатини давом эттирса ва гаровдаги фуқароларни озод этмаса, урушни қайта бошлаймиз. Ҳозир биз катта куч билан жанг майдонига қайтдик», – деди Нетаняҳу. Шунингдек, у Мудофаа вазири, ЦАҲАЛ ва хавфсизлик хизматлари ҲАМАСга қарши операцияларни кучайтиришни таклиф этганини таъкидлади. Унинг сўзларига кўра, энди музокаралар «фақат жанг майдонида» олиб борилади.
Исроилнинг Ғазо секторига қайта зарбалари
Икки ойлик сулҳдан кейин, 18 март куни Исроил Ғазо секторида ҳарбий ҳаракатларни қайта бошлади. Исроил ҳукуматига кўра, бу зарбалар ҲАМАС қўмондонларига қаратишилган. Сўнгги маълумотларга кўра, 350 дан ортиқ инсон ҳалок бўлган, улар орасида Ғазо ҳукумати бош вазири Эссам ал-Даъалис ҳам бор.
ҲАМАС Исроил ҳукуматини гаровдагилар ҳаётини хавф остига қўяётганликда айблади. БМТ Исроилнинг авиазарбаларини «қабул қилиб бўлмас» деб атади ва вазиятни зўравонликни кучайтирувчи омил сифатида баҳолади.
Халқаро муносабатлар ва АҚШнинг позицияси
АҚШ президенти Доналд Трамп ҲАМАС ҳаракатига «охирги огоҳлантириш» бериб, гаровга олинганларни зудлик билан озод қилишни талаб этди. Бироқ ҲАМАС бу талабни рад этиб, Исроил билан келишувнинг иккинчи босқичига ўтилмагунча ҳеч ким озод этилмаслигини маълум қилди.
Оқ уй матбуот котиби Керолин Ливитт Fox News телеканалига берган интервьюсида президент Трамп «дўст ва иттифоқчи Исроил»ни қўллаб-қувватлашини таъкидлади. «Президент Трамп ҲАМАС ва ҳусийчилар нафақат Исроил, балки Америка Қўшма Штатларини ҳам таҳдид остига қўймоқчи эканини аниқ тушунтирди ва улар бунинг учун товон тўлашларини таъкидлади», – деди Ливитт.
Исроил ва ҲАМАС ўртасидаги зиддият тобора чуқурлашиб, ҳарбий ҳаракатлар кескин тус олмоқда. Халқаро ҳамжамият ушбу зиддиятни бартараф этиш учун музокаралар ва тинчликка чақиришда давом этмоқда, бироқ вазият кескинлашиб бормоқда.
Ctrl
Enter
Хато топдИнгизми
Иборани ажратиб Ctrl+Enter тугмасини босингМавзуга оид янгиликлар
