АҚШ президенти Доналд Трамп ва Украина президенти Владимир Зеленский телефон орқали мулоқот ўтказди. Бу ҳақда Оқ уй маъмурияти раҳбари ўринбосари Дэн Скавино хабар берди. Унинг маълум қилишича, Трамп ва Зеленский ўртасидаги суҳбат Овал кабинетда бўлиб ўтган.
Президент Трамп бу мулоқотни «жуда яхши» деб баҳолаган ва у тахминан бир соат давом этган. Суҳбатнинг асосий мавзуси Россия президенти Владимир Путин билан бир кун аввал ўтказилган икки соатлик музокараларга асосланган ҳолда Украина ва Россиянинг эҳтиёжларини мувофиқлаштириш бўлган.
Трамп ўзининг ижтимоий тармоқдаги баёнотида «Биз тўғри йўлдамиз», дея таъкидлаган ва Давлат котиби Марко Рубио ҳамда Миллий хавфсизлик бўйича маслаҳатчи Майкл Уолцдан музокарада муҳокама қилинган мавзулар юзасидан кенг баёнот беришларини сўраган. Унинг таъкидлашича, бу баёнот тез орада эълон қилинади.
Россия ва АҚШ президентлари ўртасидаги аввалги суҳбат натижаларига кўра, Кремль Путин Украина энергетика инфратузилмасига ҳужумларни 30 кунлик тўхтатишни қўллаб-қувватлаганини маълум қилган ва ҳарбийларга тегишли буйруқ берган. Шу билан бирга, Путин Ғарб давлатлари томонидан Украинага ҳарбий ёрдамни тўхтатиш ва разведка маълумотлари алмашинувини Киев билан тўхтатиш тинчлик келишувининг асосий шарти эканлигини билдирган.
Оқ уйнинг расмий баёнотига кўра, Трамп ва Путин Украинада тинчликни таъминлаш ва ўт очишни тўхтатиш зарурлиги борасида бир фикрга келишган.
Президент Зеленский ўз навбатида Украина энергетика тизимига ҳужумларни вақтинча тўхтатиш таклифини қўллаб-қувватлашини билдирган, лекин АҚШ президенти Трамп билан бўладиган суҳбатдан кейин Россия билан эришилган келишувлар ҳақида батафсил маълумот олишга умид қилганини айтган эди.
Ctrl
Enter
Хато топдИнгизми
Иборани ажратиб Ctrl+Enter тугмасини босингМавзуга оид янгиликлар
