Венесуэлага АҚШдан депортация қилинган мигрантларнинг биринчи гуруҳи етиб келди

Венесуэлага АҚШдан депортация қилинган 199 нафар мигрантни олиб келган биринчи самолёт қўнди, деб Euronews хабар берди.

Маълум қилинишича, душанба куни эрталаб самолёт Каракас шимолидаги Майкетия халқаро аэропортига етиб келган. АҚШ ва Венесуэла ўртасида дипломатик алоқалар мавжуд эмаслиги боис, самолёт аввал Техасдаги ҳарбий базадан ҳавога кўтарилиб, Гондурасга қўнган. У ердан мигрантлар бошқа самолёт орқали Венесуэлага жўнатилган.

АҚШ ҳукумати баёнотида шундай дейилган: «Ушбу инсонларнинг Қўшма Штатларда қолиши учун қонуний асоси йўқ. Келажакда Венесуэлага депортация рейслари доимий равишда амалга оширилишини кутяпмиз. Ноқонуний иммиграцияга қарши курашда ҳамкорлик қилгани учун Гондурас президенти Кастро ҳамда унинг ҳукуматига миннатдорлик билдирамиз».

Ўтган ҳафта Венесуэла президенти Николас Мадуро ва АҚШ президенти Доналд Трамп мигрантларни депортация қилиш бўйича келишувга эришган эди. Венесуэлага репатриация февралидан бери тўхтатилган эди. Бу АҚШ президенти Chevron компаниясини Венесуэлада фаолият юритиш лицензиясидан маҳрум қилганидан кейин содир бўлган.

Вашингтон Венесуэлага рейсларни қайта тиклаш ҳақидаги қарорни 238 нафар венесуэлаликнинг Салвадордаги CECOT мега-қамоқхонасига жўнатилиши ортидан қабул қилди. АҚШ ҳукумати уларни «Трен-де-Арагуа» жиноий гуруҳига алоқадорликда айблади. Бироқ депортация қилинган мигрантларнинг қариндошлари бу айбловларни рад этмоқда.

Венесуэла Миллий ассамблеяси раиси Хорхе Родригес Гомес шундай деди: «Миграция – жиноят эмас. Биз барча муҳтожларнинг қайтарилиши ва Салвадорга ўғирланган биродарларимизнинг озод қилиниши учун ҳаракатни давом эттирамиз».

Ўтган ҳафта Николас Мадуро ўз ҳукуматига АҚШда қўлга олинган венесуэлаликларни репатриация қилиш учун зарур рейслар сонини оширишни буюрган эди. “Замин” янгиликларини “Telegram”да кузатиб боринг