Жонли трансляция қилинган нутқ бошланишидан аввал Букер Сенатга чиқишини Трамп ва Ҳукумат самарадорлиги департаменти (DOGE) раҳбари Илон Маскнинг «қонун устуворлиги, Конституция ва Америка халқи эҳтиёжларига тўлиқ беэътиборлик» кўрсатгани билан изоҳлади.
CNNʼнинг хабар қилишича, Букер нутқини 31 март куни маҳаллий вақт билан соат 19:00 да бошлаган ва 1 апрель соат 12:00 ҳолатига кўра давом эттирган. Демократ Трамп ҳаракатларига қарши чиқмоқда ва «жисмоний жиҳатдан имконли экан, нутқни давом эттираман», деб баёнот берган.
Ушбу чиқиш филлибастер (қонун қабул қилинишига тўсқинлик қилувчи нутқ) эмас, чунки сенатор қонунлар ёки тайинловларга тўсқинлик қилмаяпти. Нашр қайд этишича, у нутқни трибуна очиқ тургани, сессия зали ходимлари ва Капитолия полицияси ўз жойида экани давомида сурункали давом эттириши мумкин.
«АҚШ президенти атиги 71 кун ичида америкаликларнинг хавфсизлиги, молиявий барқарорлиги ва демократиямизнинг асосий принципларига шунчалик катта зиён етказдики… Бу Америка учун одатий вақтлар эмас. Улар АҚШ Сенатида ҳам шундай баҳоланмаслиги керак», — деди Букер.
Ню Жерси штати сенатори сифатида Букер АҚШ президентининг ижтимоий таъминот, таълим, миграция ва соғлиқни сақлаш соҳасидаги сиёсатларига қарши чиқди, деб ёзади New York Times.
Сиёсатчи ўз нутқида ташқи сиёсат масаласига ҳам тўхталиб ўтди. Жумладан, у Доналд Трампни НАТОни заифлаштиришда, Россия президенти Владимир Путинга нисбатан мойилликда ва Украина президенти Володимир Зеленскийга «диктатор» деб аталган ноўрин баёнотлари учун танқид қилди.
Бундан ташқари, Букер Трампнинг Панама ва Гренландияга қилинган таҳдидлари, ҳамда Мексика кўрфазини қайта номлаш ғоясини ҳам эслатиб ўтди.
Бироқ, The Guardian қайд этишича, Букер Сенатдаги рекордни янгилаш учун ҳали узоқ йўл босиши керак. 1957 йилда республикачи Стром Термонд Фуқаролик ҳуқуқлари тўғрисидаги қонунга тўсқинлик қилиш мақсадида 24 соат 18 дақиқа нутқ сўзлаган эди.
AP News ёзишича, 55 ёшли Кори Букер Вашингтонда туғилган, Ню Жерсида ўсган. Унинг айтишича, оиласи ирқий камситишга дуч келган, жумладан, ота-онаси уй сотиб олмоқчи бўлганида тўсиқларга учраган.
Букер Стэнфордда футбол ўйнаган, Йел университетида ҳуқуқшуносликни ўрганган ва кам таъминланган оилаларга ёрдам берувчи адвокат сифатида ишлаган. Кейинчалик Нюарк (Ню Жерсининг энг йирик шаҳри) шаҳар ҳокими ва АҚШ сенатори бўлган.
2013 йилда у Сенатга навбатдан ташқари сайловда ғалаба қозонди, кейин эса 2014 ва 2020 йилларда тўлиқ муддатларга сайланди. 2020 йилда у президентлик сайловида иштирок этди, аммо унинг кампанияси муваффақиятга эришмайди.
Ctrl
Enter
Хато топдИнгизми
Иборани ажратиб Ctrl+Enter тугмасини босингМавзуга оид янгиликлар
