Ғарбий Хитойда археологлар кутилмаган ташқи кўринишга эга бўлган ўнлаб мумиёларни топдилар. Улар оқ танли, малла сочли ва баланд бўйли бўлиб, бундан минг йиллар олдин Такламакон чўлида, Тарим дарёси ҳавзасида дафн этилган. Бу топилма қадимги цивилизация ва маданиятлар ўртасидаги алоқалар ҳақида янги маълумотларни очиб бериши мумкин.
Сирли халқ излари
Баъзи тадқиқотчилар бу мумиёлар Осиё қитъасининг марказида қадим замонларда европоид халқлар яшаганлигини кўрсатиши мумкинлигини таъкидламоқда. Ҳозиргача 300 дан ортиқ Тарим мумиёлари аниқланган бўлиб, уларнинг энг машҳурлари Лоулан гўзали ва Черчен одами ҳисобланади.
Лоулан гўзали ва Черчен одами
Лоулан гўзали – тахминан 3800 йил олдин яшаган, бўйи 180 сантиметр келадиган, тўқ сариқ сочли аёл мумиёси. Унинг танаси мукаммал ҳолда сақланган бўлиб, дафн этилган жойидан унинг шахсий буюмлари – тароқ, сават ва бўйра топилган.
Черчен одами эса оқ сочли, юзида татуировка белгиларига эга бўлиб, у кўплаб дафн буюмлари билан кўмилган. Археологлар унинг ёнидан ҳатто чақалоқ мумиёси топган бўлиб, унинг кўзларига кўк тошлар қўйилган.
Тарихий алоқалар ва тахминлар
Олимлар бу одамлар ким бўлганини аниқлашга ҳаракат қилмоқда. Бир назарияга кўра, улар тохарлар – Марказий Осиёда яшаган сирли халқ вакиллари бўлиши мумкин. Бошқа тахминларга кўра, улар қадимги ҳинд-европа халқларининг миграция йўллари билан боғлиқ.
Қизиғи шундаки, Рим ёзувчиси Катта Плиний милодий I асрдаёқ Хитой ҳудудида "ўрта бўйдан баланд, зиғир сочли ва кўк кўзли" одамлар мавжудлигини ёзиб қолдирган. Бу эса Тарим мумиёлари ҳақидаги тахминларни янада мустаҳкамлайди.
Қадимги Хитойнинг изоляциясига янги қараш
Тарим мумиёларининг номаълум келиб чиқиши қадимги Хитойнинг изоляцияланган давлат сифатида қаралишига шубҳа уйғотади. Бу топилмалар Осиё ва Европа маданиятлари ўртасидаги алоқалар анча илгаридан мавжуд бўлганлигини кўрсатиши мумкин.
Шунингдек, апрель ойи бошида Хитойда неандертал одамларнинг излари топилгани маълум бўлди. Бу топилмалар Ғарбий Европага хос услубда ишланган бўлиб, Шарқ илгари ўйланганидек алоҳида ривожланмаганини тахмин қилишга асос бўлди. Археологик топилмалар инсоният тарихини янада яхшироқ тушунишга имкон яратмоқда.
Ctrl
Enter
Хато топдИнгизми
Иборани ажратиб Ctrl+Enter тугмасини босингМавзуга оид янгиликлар
