Хитой божлари АҚШ фонд бозорини ларзага солди

Хитой АҚШ товарларига 34 фоизлик бож жорий этишини эълон қилганидан сўнг, АҚШ фонд индекслари пасайишни давом эттирди, деб The Economist хабар берди.

Dow Jones индекси 2,2 фоизга пасайди, S&P 500 — 2,5 фоизга ва NASDAQ — 2,6 фоизга тушди. Tesla ва Apple акциялари ҳар бири 6 фоизга арзонлашди. Alphabet, Microsoft, Nvidia ва бошқа йирик технология компаниялари акциялари ҳам тушишда давом этмоқда.

Активлар бўйича АҚШнинг энг йирик банки JPMorgan Chase акциялари 7,3 фоизга камайди. Goldman Sachs ва Morgan Stanley акциялари ҳам шунчага яқин даражада тушди.

Йирик нефть компаниялари ҳам бунда орқада қолмади: Exxon акциялари 4,8 фоизга, Chevron — 4 фоизга тушди. Мамлакатдаги энг йирик нефтни қайта ишлаш корхонаси Marathon Petroleum акциялари 4,6 фоизга арзонлашди.

Хитойнинг божлар жорий этишга муносабати инвесторлар орасида мамлакатлар музокара ўтказишдан кўра ўзаро кескин чоралар кўриши мумкин, деган хавотирларни кучайтирди. Бу эса кенг кўламли савдо уруши бошланиш эҳтимолини оширди.

Бир кун аввал, Дональд Трамп бошқа мамлакатлардан келадиган импорт товарларга янги божлар жорий қилиш ҳақидаги хабаридан сўнг жаҳон бўйлаб компанияларнинг умумий бозор қиймати 3,1 триллион долларга камайди. Шунингдек, асосий фонд индекслари 5-6 фоизга йўқотишга учради. “Замин” янгиликларини “Telegram”да кузатиб боринг