Хитой бир вақтда 6 та сунъий йўлдошни орбитага олиб чиқди

Хитой аэрокосмик фан ва технология корпорацияси (CASC) олтита «Шиян-27» сунъий йўлдошини қуёш билан синхрон орбитага муваффақиятли олиб чиққанини маълум қилди.

Учириш Пекин вақти билан 06:51 да Тайюан космодромидан CZ-6A (Changzheng-6A) ракетаси ёрдамида амалга оширилди. Бу «Long March» серияли ракеталарнинг 570-учирилиши ҳисобланади.

Корпорация маълумотларига кўра, ушбу сунъий йўлдошлар асосан космик муҳитни ўрганиш ва тегишли технологик тадқиқотларни ўтказиш учун ишлатилади.

Икки босқичли CZ-6A ракетасининг узунлиги 50 метр бўлиб, экологик тоза бўлган керосин ва суюқ кислород аралашмасида ишлайди. Ракета тўртта қаттиқ ёнилғили кучайтиргич билан жиҳозланган бўлиб, тахминан 6,5 тонна оғирликдаги фойдали юкларни 500 километр баландликдаги орбитага олиб чиқиш имкониятига эга.

CZ-6A ракета турининг бу 26-миссияси бўлиб, жорий 2025 йилдаги учинчи парвозидир.

Сиз нима деб ўйлайсиз: Хитойнинг космосга бундай тез ва тинимсиз чиқишлари глобал илмий рақобатга қандай таъсир қилади? «Замин»ни Telegram’да ўқинг!