Трамп Россия ва Украина яқин кунларда келишувга эришишига умид билдирмоқда

АҚШ президенти Доналд Трамп яқин кунлар ичида Россия ва Украина ўртасида тинчлик келишуви имзоланишига умид қиляпти. Бу ҳақда у Truth ижтимоий тармоғидаги саҳифасида маълум қилди.

«Мен Россия ва Украинанинг шу ҳафта ичида ўзаро келишувга эришишига чин дилдан умид қиламан. Шундан кейин икки давлат ҳам АҚШ билан кенг кўламли бизнесни йўлга қўя олади ва бу уларнинг иқтисодий ўсиши ҳамда фаровонликка эришишига хизмат қилади», – деб ёзган Трамп ўз постида.

Бироқ Доналд Трамп айнан қандай «келишув» назарда тутганига ойдинлик киритмаган ва бошқа қўшимча тафсилотларни ҳам бермаган. Ҳозирча АҚШ президентининг ушбу баёнотига на Москва, на Киев томонидан ҳеч қандай расмий муносабат билдирилмаган.

Эслатиб ўтамиз, 17 апрель куни АҚШ Давлат котиби Марко Рубио мамлакатнинг тинчлик келишуви бўйича музокараларда натижага эришиш имкониятини кўрмаса, яқин кунлар ичида бу йўналишдаги саъй-ҳаракатларини тўхтатиши мумкинлигини айтган эди.

Айтиш лозимки, бир неча кун аввал Доналд Трамп давлат котиби Марко Рубио, махсус вакил Стив Уиткофф ҳамда бошқа юқори лавозимли маслаҳатчилар билан бўлиб ўтган учрашувда, музокаралар муваффақиятсиз якунланса, Қўшма Штатларнинг Украинадаги тинчлик музокараларидан чиқиши ҳақида таклиф билдирган эди. Шунингдек, АҚШ президенти Россия ва Украинанинг ҳар иккиси ҳам урушни тугатишга қизиқиш билдиришаётганига ишонч билдирганди.

17 апрель куни Bloomberg агентлиги Парижда бўлиб ўтган учрашув чоғида АҚШнинг Европадаги иттифоқчиларига Украина бўйича "мустаҳкам ва барқарор тинчлик режасини" таклиф этгани ҳақида маълум қилди. Унга кўра, келишув натижасида Россия Украинанинг аллақачон эгаллаб олган айрим ҳудудларида ўз назоратини сақлаб қолади, бундан ташқари, узоқ муддатли тинчлик келишуви имзоланса, Россияга қўйилган санкциялар босқичма-босқич юмшатилиши назарда тутилмоқда.

Россия-Украина можаросида тинчлик келишувига оид янгиликлар жаҳон жамоатчилигининг диққат марказида бўлиб турибди. «Замин»ни Telegram’да ўқинг!