Дональд Трампга ишонч рекорд даражада пасайиб кетди: америкаликлар нима учун норози?

Америкаликларнинг АҚШ президенти Дональд Трампга бўлган ишончи 42 фоизгача пасайиб кетди. Бу кўрсаткич унинг Оқ уйга қайтиб келган пайтидан бери қайд этилган энг паст натижа бўлди. Reuters агентлиги бу ҳақда Ipsos тадқиқот компанияси билан ҳамкорликда ўтказган ижтимоий сўров натижаларига асосланиб хабар бермоқда.

Сўровнома натижаларига кўра, иштирокчиларнинг атиги 42 фоизи Трампнинг мамлакат раҳбари сифатидаги ишларини маъқуллашса, 53 фоизи унинг юритаётган сиёсатига қарши эканликларини билдиришган.

Эслатиб ўтиш жоизки, Ipsos томонидан аввал ўтказилган сўровномада Трампни қўллаб-қувватлаш даражаси 43 фоизни ташкил қилган эди. Март ойининг иккинчи ярмида эса бу кўрсаткич 45 фоизгача етган эди.

Reuters агентлигига кўра, Трамп обрўсининг тушишига сабаблардан бири унинг маъмурияти томонидан ҳаддан зиёд либерал деб қаралган университетларга нисбатан босим ва таъқиб сиёсати бўлиши мумкин. Жумладан, апрель ойининг ўрталарида АҚШ таълим вазирлиги мамлакатдаги энг нуфузли ўқув юртларидан бири – Гарвард университети учун ажратилган 2,2 миллиард долларлик грантлар ва 60 миллион долларлик узоқ муддатли шартномаларнинг вақтинча тўхтатиб қўйилганини эълон қилган эди.

Шу билан бирга, тадқиқотда қатнашган америкаликларнинг 59 фоизи мамлакат халқаро майдондаги обрў-эътиборини йўқотаётганидан хавотир билдиради. Сўралганларнинг тахминан тўртдан уч қисми (75 фоизга яқин) Дональд Трампнинг 2028 йилда учинчи муддатга президентлик учун сайловда иштирок этишига қарши эканликларини маълум қилган.

АҚШ аҳолиси орасидаги бундай муносабатлар мамлакатнинг ички ва ташқи сиёсатида турли ўзгаришларга сабаб бўлиши мумкин. Бу ўзгаришларнинг келгусидаги оқибатлари қандай бўлиши, шубҳасиз, бутун дунё эътиборида турибди. «Замин»ни Telegram’да ўқинг!