Кексалар учун кунига атиги 3 дақиқалик фаоллик ҳам юрак саломатлигини яхшилайди

Сидней университети олимлари олиб борган янги тадқиқотга кўра, кунига атиги уч дақиқа давом этадиган ўртача жисмоний фаоллик ҳам кекса ёшли одамларда юрак-қон томир касалликлари хавфини ва ўлим эҳтимолини сезиларли даражада камайтириши мумкин экан.

Мутахассисларнинг таъкидлашича, олдинги кўплаб тадқиқотлар натижасида инсонлар ҳатто махсус машқлар билан шуғулланмай туриб ҳам соғлиғини яхшилаши мумкинлиги аниқланган. Бунда уй ишларини бажариш, дўконга бориб-келиш ёки боғда ишлаш каби кундалик оддий фаолликнинг ўзи ҳам катта аҳамиятга эга. Олимлар бундай оддий ва махсус тайёргарликни талаб қилмайдиган ҳаракатларни «тасодифий жисмоний фаоллик» деб атаган.

Янги тадқиқот доирасида Сидней университети олимлари ўртача ёши 62 бўлган 24 мингдан ортиқ одамнинг ҳаёт тарзини ўрганиб чиққан. Маълумотлар инсон биологик намуна ва маълумотларининг йирик халқаро омбори бўлган Британия Биобанкидан олинган.

Иштирокчилар дастлаб ўзларини камҳаракат деб ҳисоблаган. Бироқ уларнинг ҳақиқий жисмоний фаоллигини аниқлаш учун ҳар бир иштирокчи бир ҳафта давомида билагига махсус акселерометр қурилмасини тақиб юрган. Ушбу қурилма одамнинг ҳаракатларини аниқ ўлчашга имкон беради.

Таҳлил натижалари шуни кўрсатдики, кунига атиги уч дақиқа ўртача интенсивликда ҳаракат қилган инсонларда инфаркт, инсулт ва бошқа турдаги юрак-қон томир касалликлари ривожланиш хавфи анча пасайган. Шу билан бирга, кунлик ҳаракатнинг давомийлиги ва фаоллик даражаси ортган сари, соғлиқ кўрсаткичлари янада яхшиланган.

Қизиқарлиси, тадқиқот давомида аёлларнинг эркакларга нисбатан тасодифий жисмоний фаоллик билан кўпроқ шуғулланиши ҳам аниқланган. Олимлар буни аёлларнинг уй юмушлари ва кундалик ишларга кўпроқ жалб қилиниши билан изоҳламоқда.

Тадқиқот муаллифлари кундалик оддий ҳаракатларнинг аҳамиятини ҳеч қачон паст баҳоламаслик кераклигини алоҳида таъкидлайди. Овқат тайёрлаш, уй тозалаш ёки боғдаги оддий ишлар каби кундалик фаоллик ёши катта инсонлар учун юрак саломатлигини сақлашда муҳим ўрин тутади. Олимларнинг хулосасига кўра, ҳатто кекса ёшда ҳам мана шундай кичик фаолликлар инсон умрини узайтириб, соғлом ҳаёт кечириш имконини беради. «Замин»ни Telegram’да ўқинг!