Трамп Россия ва Украина раҳбарларидан узоқ муддатли тинчликка эришишни талаб қилмоқда

АҚШ президенти Доналд Трамп Украина ва Россия етакчиларидан ҳарбий ҳаракатларни вақтинчалик эмас, балки доимий равишда тўхтатиш ҳақида келишиб олишларини талаб қиляпти. Бу ҳақда Оқ уй матбуот хизмати раҳбари Кэролин Левитт 27 апрель куни Трамп ва Украина президенти Владимир Зеленский ўртасида бўлиб ўтган музокаралар тафсилотларини журналистларга етказар экан маълум қилди.

«Президент Трампнинг икки мамлакат раҳбарларига нисбатан норозилиги кун сайин ошиб бормоқда. У бир неча бор музокараларда ўт очишни вақтинча эмас, доимий равишда тўхтатиш муҳимлигини таъкидламоқда. Менинг билишимча, бугун эрталаб Россия президенти Владимир Путин можарони вақтинчалик тўхтатиб туришни таклиф қилди. Аммо АҚШ президенти бу билан кифояланмоқчи эмас ва тинчликни доимий асосда ўрнатишни талаб қилмоқда. Трамп биринчи навбатда инсонлар ҳалок бўлишини тўхтатиш кераклигини урғуламоқда», деди Левитт.

Оқ уй расмийсига кўра, Трамп Украина ва Россия етакчиларининг тинчлик бўйича келишувга эришиши мумкинлиги ҳақида оптимистик кайфиятда, бироқ вазиятни реал баҳоламоқда. Трамп фикрича, Зеленский ва Путин бу можародан чиқиш учун музокараларни жиддий равишда давом эттиришлари лозим.

Шу билан бирга, Кремль 28 апрель куни Россия Ғалабанинг 80 йиллиги муносабати билан «ҳуманитар сабабларга кўра» вақтинчалик сулҳ эълон қилди. Россия томонининг баёнотига кўра, ушбу режим 8 май ярим тундан бошланиб, 11 май ярим тунгача давом этади.

Бугунги кунда дунё ҳамжамияти, жумладан АҚШ маъмурияти ҳам икки томон ўртасидаги музокараларда тинчликнинг доимий шаклда ўрнатилиши муҳим эканини қайд этмоқда. Бу нафақат сиёсий, балки инсоний нуқтаи назардан ҳам жуда катта аҳамият касб этади. «Замин»ни Telegram’да ўқинг!