Хитой компаниялари Трамп тарифларидан қутулиш йўлини топди

АҚШ президенти Доналд Трампнинг Хитой товарларига қарши жорий қилган оғир тарифларидан қочиш учун хитойлик ишлаб чиқарувчилар кутилмаган, аммо фойдали ечимни топган кўринади. Bloomberg ахборот агентлигининг маълум қилишича, улар энди маҳсулотларини Ҳиндистон экспортчилари орқали Америка бозорига етказиб бериш йўлини изламоқда.

Ҳиндистон экспорт ташкилотлари федерациясининг бош директори Ажай Саҳайнинг айтишича, яқинда Гуанчжоуда ўтказилган Кантон ярмаркасида бир неча Хитой компаниялари ҳинд ишлаб чиқарувчиларига мурожаат қилиб, АҚШга товар жўнатишда ёрдам беришни таклиф қилган. Ушбу хизмат эвазига уларга яхши комиссия таклиф қилингани маълум қилинди.

АҚШ ҳукумати кўплаб Хитой товарларига 145 фоизгача бўлган юқори божлар белгилаган бўлса, Ҳиндистондан кириб келадиган маҳсулотларга бор-йўғи 10 фоиз тариф қўлланади. Бундай вазиятда хитойлик экспортчилар учун ҳинд компаниялари орқали савдо қилиш анча манфаатлироқ бўлиб қолади.

Олдинроқ хитойлик компаниялар АҚШ бозорига чиқиш учун Вьетнамда ишлаб чиқариш корхоналарини очган ёки маҳсулотларини Таиланд орқали етказиб беришни режалаштирган эди. Бироқ Доналд Трамп бунга ҳам чек қўйиб, Вьетнам маҳсулотларига 46 фоиз тариф жорий қилди. Бу эса Хитой компанияларини янги ҳамкор – Ҳиндистонга мурожаат қилишга мажбур қилди.

Шунингдек, Хитой экспортчилари учун бошқа бир жиддий муаммо ҳам бор: Ҳиндистон ҳукумати мамлакатдаги хитойлик сармояларга чекловларни сақлаб қолмоқда. Бу эса уларнинг Ҳиндистонда бизнес юритишини ёки бу мамлакат орқали маҳсулот экспорт қилишини бироз қийинлаштириши мумкин.

Мутахассисларга кўра, хитойликлардан келиб тушаётган асосий таклифлар қўл асбоблари, электроника ва маиший техника соҳаларига тегишлидир. Экспорт маҳсулотлари ишлаб чиқариш билан шуғулланувчи Ҳиндистоннинг OayKay Tools компанияси вакили Сиддҳант Аггарвалнинг айтишича, улар ҳам хитойлик ва америкалик ҳамкорлари билан музокаралар олиб бормоқда.

Агар бу режа амалга ошадиган бўлса, хитойлик ишлаб чиқарувчилар ўз товарларини АҚШга нисбатан қулай тарифлар билан олиб кириб, катта даромадини сақлаб қолиши мумкин. Шу билан бирга, Ҳиндистон экспортчилари ҳам АҚШ бозорида ўз ўрнини мустаҳкамлаб, бу орқали қўшимча даромад олиш имконига эга бўлади. «Замин»ни Telegram’да ўқинг!