Полша бош вазири: «Жаҳон сиёсатига шафқатсизлик ва худбинлик қайтмоқда»

Полша бош вазири Доналд Туск 1 май куни телевидение орқали қилган мурожаатида дунё сиёсати оғир бир босқичга кириб бораётганини алоҳида таъкидлади. Унинг фикрича, ҳозирги глобал вазиятда собитқадамлик ва аниқ қадриятларга содиқлик ўрнига ноаниқлик, шафқатсизлик ва эгоизм яна ўз ўрнини эгаллай бошлаган.

«Биз жуда мураккаб замонларга кириб келдик. Афсуски, бугунги кунда халқаро сиёсатда яна шубҳа-гумон, қатъиятсизлик ва ўзгарувчанлик ҳукмрон бўлиб қолмоқда. Инсонпарварлик ва қадриятларга содиқлик ўрнини кўпроқ шахсий манфаатлар ва моддий фойда кўришга интилиш эгаллаяпти», — деди Туск.

Полша ҳукумати раҳбари бу вазиятни хавотир билан кузатаётганини, лекин бу каби ўзгаришларга қарши курашиш лозимлигини урғулади. Унинг таъкидлашича, ҳозирги дунёда қадриятлар учун курашиш ва уларни ҳимоя қилишда катта масъулият бор.

Шунингдек, Доналд Туск ўз чиқишида мамлакат иқтисодиётига ҳам тўхталиб, Полша тадбиркорлари ва маҳаллий ишлаб чиқарувчилар манфаатларини ҳимоя қилиш учун ҳукумат барча зарур чораларни кўришини ваъда қилди.

«Биз ўз ишлаб чиқарувчиларимиз учун ички бозорда энг қулай шароитларни яратишга ҳаракат қиламиз. Миллий иқтисодиётни кучайтириш учун иқтисодий миллатчиликка ҳам эътибор беришимиз керак. Бу тушунчада ёмон нарса йўқ, аксинча, у бизнинг иқтисодий ривожланишимиз учун муҳим аҳамиятга эга», — деб қўшимча қилди Полша бош вазири. «Замин»ни Telegram’да ўқинг!