Дональд Трамп ўзининг эҳтимолий ворисларини маълум қилди

АҚШ президенти Дональд Трамп давлат раҳбари лавозимидаги муддати якунланганидан кейин ўз сиёсий фаолиятини давом эттирадиган, мамлакат келажаги учун масъулиятни ўз зиммасига ола билиши мумкин бўлган ворислар ҳақида гапирди. Бу ҳақда президент NBC News телеканалига берган интервьюсида маълум қилди.

Журналист Кристен Уэлкер билан суҳбатда Трамп, келгусида мамлакатни бошқариш салоҳиятига эга бўлган сиёсатчилар сифатида давлат котиби Марко Рубио ҳамда вице-президент Жей Ди Венсни қайд этиб ўтди. Унинг фикрига кўра, айнан шу икки сиёсатчи унинг кейинги сиёсий йўналишини давом эттириб, «Американи яна буюк қиламиз» ҳаракатига раҳбарлик қилиши мумкин.

Президент бу икки ном билан чекланиб қолмасдан, яна 10-15, балки 20 нафар сиёсатчи ҳам мамлакат келажагини муваффақиятли таъминлаш ва уни янада юксалтириш учун бор кучини сарфлашга тайёр эканини билдирди.

«Мен президентлик муддатим тугаганидан кейин, мамлакат келажаги учун жуда кўп сиёсатчилар кураша олади. Бизда АҚШ Демократик партиясидагидан фарқли ўлароқ, иқтидорли ва ёш сиёсатчилар бор. Менинг ортимдан келаётган бу ёш авлод мамлакатни бошқаришда фаол қатнашиши мумкин. Демократларда эса афсуски, ёш ва иқтидорли сиёсатчилар деярли йўқ», – деди Трамп.

Трампнинг айтишича, бу вазият унинг ворислари учун соғлом рақобат муҳитини ярата олмаслиги мумкин.

Айни пайтда АҚШ конституциясида белгиланган тартибга кўра, мамлакат президенти икки муддатдан ортиқ лавозимни эгаллаши мумкин эмас. Конституциянинг 22-тузатишига биноан, «ҳеч бир шахс икки муддатдан кўп президентликка сайланмаслиги лозим». Бу қоида фақат Конституцияга ўзгартириш киритиш орқалигина ўзгартирилиши мумкин бўлиб, бунинг учун Конгресснинг икки палатаси (Сенат ва Вакиллар палатаси) аъзоларининг учдан икки қисми овоз бериши, шунингдек, штатларнинг тўртдан уч қисми томонидан қўллаб-қувватланиши талаб этилади.

«Мен АҚШ президенти лавозимида саккиз йил, яъни икки муддат хизмат қиламан. Бу мен учун муҳим аҳамиятга эга бўлган қоидадир. Буни доимо очиқ айтганман», – деди Дональд Трамп.

Бироқ у, эҳтимолий учинчи муддат ҳақидаги фикрлари ҳам жиддий эканини билдирди. Трамп бу масалани муҳокама қилиш учун ҳали эрталиги, аммо кўплаб одамлар унга бу борадаги қарорни қўллаб-қувватлашини таъкидлади.

«Учинчи муддат ҳақидаги фикрларим жиддий, лекин бу мавзуда якуний қарорга келишга вақт бор. Бу масалада фикримни қўллаб-қувватлайдиганлар кўп эканини ҳам билиб турибман», – деб қўшимча қилди у.

Трампнинг бу баёноти АҚШдаги сиёсий муҳитни янада қиздириб юборди. Мухлислар ва сиёсий экспертлар энди мамлакатда янги етакчилар пайдо бўлиши, уларнинг сиёсий майдонда қандай ҳаракат қилиши ва кимлар Трампнинг ўрнини эгаллаши мумкинлиги хусусида фаол баҳс бошлади.

Эслатиб ўтамиз, АҚШда навбатдаги президентлик сайловлари яқинлашмоқда ва мамлакат келажагини ҳал қилувчи бу сайловда Дональд Трамп иштирок эта олмайди. Унинг партияси ва сиёсий ҳаракати учун янги номзод танлаш ва АҚШ сиёсий майдонида ўз ўрнини сақлаб қолиш асосий вазифага айланган. «Замин»ни Telegram’да ўқинг!