Кашмирда портлашлар, ракеталар ва тўқнашувлар: Ҳиндистон-Покистон тортишуви хавфли босқичга кирмоқда

7 майга ўтар кечаси Кашмирнинг Покистон назоратидаги қисми яна бир бор кенг қамровли ҳарбий тўқнашувларга гувоҳ бўлди. Ярим тундан кейин Музаффаробод шаҳри ва унинг атрофларига бир неча ракеталар йўллангани ва кучли портлашлар юз бергани ҳақида маҳаллий аҳоли хабар берди. Ҳодисадан сўнг шаҳарда электр таъминоти мутлақо узилиб қолди.


Гап нимада?

Ҳиндистон Мудофаа вазирлиги ушбу ҳужумни расман тасдиқлар экан, уни “Синдур операцияси” деб номлади. Ҳинд манбаларига кўра, ушбу амалиёт доирасида Кашмирдаги “террорчилик инфратузилмалари”га қарши зарбалар берилган. Умумий ҳисобда тўққизта манзилга ҳужум қилинган. Ҳужумда “ер-ер” синфидаги замонавий баллистик ракеталар қўллангани таъкидланмоқда.

Ҳиндистон Мудофаа вазирлиги:
«Бу амалий зарбалар фақат террорчиларнинг лагерлари ва логистика марказларини нишонга олди. Покистон армиясининг расмий объектлари ҳеч қандай уришга учрамади», — дейилган расмий баёнотда.

Покистон томони ҳам жим турмади

Покистон Мудофаа вазирлиги Ҳиндистон ракета зарбалари билан мамлакат ҳудудини нишонга олганини расман тасдиқлади. Ҳукумат шошилинч равишда хавфсизлик йиғилишини ўтказган ва ушбу тажовузга жавобан чоралар кўрилишини маълум қилган.

Шу билан бирга, Покистон авиацияси ўз ҳаво маконини барча халқаро ва маҳаллий рейслар учун 48 соатга ёпиш қарорини қабул қилди. Бу ҳаракат эҳтимолий ҳаводан ҳужумларга қарши эҳтиёт чораси сифатида баҳоланмоқда.

Фон: Нега вазият шу даражада кескинлашди?

Келиб чиққан зиддият 22 апрелда Жамму ва Кашмирда содир бўлган қонли ҳужумдан кейин янада авж олди. Туристлар орасида машҳур Паҳалгам шаҳрида қуролланган жангарилар томонидан амалга оширилган ҳужумда 26 киши ҳалок бўлди. Жавобгарликни эса Покистон назоратидаги Кашмир ҳудудидан фаолият юритувчи жангарилар гуруҳи ўз зиммасига олди.

Шундан сўнг, Ҳиндистон ҳукумати Покистонга қарши қатор кескин чоралар кўрди: чегара ёпилди, Покистон фуқаролари мамлакатни тарк этишга мажбур қилинди ва ҳарбий тайёргарлик даражаси оширилди.

Таҳлилчилар нима дейди?

Мутахассислар фикрича, ҳозирги вазият Ҳиндистон ва Покистон ўртасидаги узоқ йиллик зиддиятнинг энг хавфли босқичларидан бирига айланмоқда. Ядровий қуролга эга бўлган икки давлатнинг бундай тўқнашуви нафақат минтақавий, балки глобал хавфсизлик учун ҳам жиддий таҳдид солиши мумкин.

Ҳозирча халқаро ҳамжамият вазиятни барқарорлаштириш учун қандай чора кўради — номаълум. Аммо бу кечанинг воқеалари икки давлат ўртасидаги муносабатларда янада жиддий бурилиш ясаши аниқ. «Замин»ни Telegram’да ўқинг!