Покистон “айёр душман”га жавоб зарбасини берди: Шаҳбоз Шариф Ҳиндистонга нисбатан қатъий баёнот билан чиқди

Жанубий Осиёдаги тортишув яна кескин тус олди. Покистон бош вазири Шаҳбоз Шариф 7 май куни Х (собиқ Twitter) ижтимоий тармоғидаги расмий саҳифаси орқали Ҳиндистонга нисбатан қаттиқ баёнот билан чиқди. Унинг сўзларига кўра, “айёр душман” Покистоннинг бешта ҳудудига “қўрқоқларча ҳужумлар” уюштирган ва бу мамлакат миллий хавфсизлигига қарши очиқ тажовуз сифатида баҳоланади.

«Бизнинг беш ҳудудимизга қилинган бу қўрқоқ зарбаларга жавоб бермасликнинг иложи йўқ. Покистон Ҳиндистон томонидан бошланган бу уруш актига муносиб ва қатъий жавоб беришга тўлиқ ҳақли. Ва бу жавоб аллақачон берилди», — дея таъкидлади Шариф.

Бош вазир шунингдек, бу вазият юзасидан миллий миқёсдаги муҳим қарорларни муҳокама қилиш учун Покистон Миллий хавфсизлик кенгашининг махсус йиғилишини чоршанба куни маҳаллий вақт билан соат 10:00 га белгилади.

Покистон ахборот вазири Аттаулла Тарар эса ўз навбатида мамлакат Ҳаво кучлари томонидан Ҳиндистоннинг иккита қирувчи самолёти ва бир дрони уриб туширилганини маълум қилди. Шунингдек, Кашмирдаги бўлиниш чизиғи бўйлаб Ҳиндистоннинг бир неча постлари, шу жумладан бригадасига тегишли штаб-квартира ҳам нишонга олиниб, йўқ қилинганини иддао қилди.

Бироқ, Ҳиндистон армияси бу даъволарга жавоб қайтармади ва расмий муносабат билдиргани йўқ.

Сиёсий таҳлилчиларга кўра, икки ядровий давлат ўртасидаги бу каби зиддиятли баёнотлар минтақавий хавфсизликни жиддий таҳдид остига қўяди. Хусусан, Кашмир масаласи йиллар давомида икки томон ўртасида зиддият ўчоғи бўлиб келмоқда.

Ҳозирча можаро кенгайиши ёки дипломатик музокаралар орқали юмшатилиши номаълум, аммо вазиятни диққат билан кузатиш ва ҳар қандай кескин ҳаракатларнинг олдини олиш минтақада тинчликни сақлаш учун жуда муҳим ҳисобланади.

Сиз бу тортишув ҳақида нима деб ўйлайсиз? Можаро қандай йўналишда давом этиши мумкин? «Замин»ни Telegram’да ўқинг!