Вэнснинг муросага чақируви: У Россия ва Украинани тўғридан-тўғри музокараларга чақирди

АҚШ вице-президенти Жеймс Дэвид Вэнс халқаро эътиборни яна Украина муаммосига қаратди. 7 май, чоршанба куни Вашингтонда ўтказилган муҳим муҳокамада у Россия ва Украинани бевосита суҳбат олиб боришга чақирди. Вэнснинг сўзларига кўра, икки давлат ўртасида диалог бошланмаса, вазият янада оғирлашиши мумкин.

“Бизга маълумки, отишмаларни тўхтатишнинг энг муҳим босқичи — бу тўғридан-тўғри мулоқот”, — дея таъкидлади Вэнс. Унинг фикрича, АҚШнинг самарали воситачи сифатида ҳаракат қилиши ҳам, айнан шу алоқаларга боғлиқ. “Музокараларсиз тинчликка эришиш амри маҳол”, — дейди у.

Муаммони музокара йўли билан ҳал қилиш зарур

Вэнс Украина ва Россия ўртасидаги қарама-қаршиликларни юмшатиш учун ҳар иккала томон ҳам жадал ҳаракат қилишини кутмоқда. Шу билан бирга, Россия томони ўзига хос талаблар қўймоқда, дейди у. “Бу шартлар ҳаддан ташқари қаттиқ ва талаблар сони ҳам ортиқча”, — дея тан олди АҚШ вице-президенти.

Трамп — “стратегик реалист”

Мюнхен хавфсизлик конференцияси собиқ раҳбари Волфганг Ишингер билан суҳбатда Вэнс Доналд Трампнинг бу борадаги позициясини ҳимоя қилди. Унинг таъкидлашича, Трамп урушни қатъий танқид қилса-да, у “стратегик реализм” йўлида ҳаракат қилмоқда. “Бу Россияни оқлаш эмас, балки вазиятни чуқур тушунишни англатади”, — деб таъкидлади Вэнс.

Унинг сўзларига кўра, Трамп “инсонпарварлик йўлида”, урушни тўхтатиш ва қурбонлар сонини камайтириш ниятида. Бу ёндашув халқаро муносабатларда Америка томонидан тинчликка олиб борувчи ечимларни излашга ишора сифатида баҳоланмоқда.

Шарқ ва Ғарб ўртасида диалог зарур

Айни пайтдаги вазият ҳар икки томон учун ҳам катта синов бўлиб қолмоқда. Вэнснинг таклифи эса янги музокаралар бошланиши учун умид уйғотмоқда. Халқаро ҳамжамият эса бу жараёнда асосий ролни ижобий таъсир ва тинчлик ҳаракатлари орқали ўйнаши керак. АҚШ вице-президентининг сўзларига қараганда, урушнинг ҳар икки томон учун ҳам йўқотиш эканлиги — энди ҳаммани ҳаракатга келтириши керак. «Замин»ни Telegram’да ўқинг!