Папа сайлови олдидан кардиналлар нега “Конклав” фильмини томоша қилишди?

^{«Конклав» (2024) филмидан кадр}
Ватиканда Папа сайлови арафасида католик кардиналлари катта экранда кино томоша қилишди. Унчалик одатий бўлмаган бу воқеа ҳақида Politico нашри ўз манбаларига таяниб хабар тарқатди.

Маълумотларга кўра, “Конклав” номли фильм Папа сайлови жараёнини амалий равишда англаш ва муҳитга сингиб кетиш учун кардиналлар томонидан репетиция сифатида томоша қилинди. Фильмда асосий ролни машҳур актёр Рэйф Файнс ижро этган.

133 нафар кардинал — кўпчилиги учун бу илк тажриба

Жорий конклавда жами 133 нафар кардинал иштирок этган. Уларнинг катта қисми бу жараёнда илк марта қатнашди. Шу сабабли, фильм улар учун фақат кўнгилочар тасвир эмас, балки ҳақиқий методик қўлланма вазифасини ўтаган.

Католик черкови вакиллари фильмни "ипидан игнасигача сайлов жараёнини аниқ акс эттирган", деб таърифлашмоқда. Ундаги деталлар, шахсий муносабатлар ва махфий муҳокамалар Папа танлаш мураккаблиги ва тарихий масъулиятини ёрқин намоён қилган.

Фильм Папа Франциск ҳаётида намойиш этилган эди

“Конклав” фильми Папа Францискнинг вафотидан бир неча ой олдин катта экранларга чиққан бўлиб, айнан шундай вазият учун тайёрланган каби қабул қилинган. У реал воқеалар ва Черков анъаналари асосида суратга олинган.

Янги Папа — тарихда илк бор америкалик кардинал

Эслатиб ўтамиз, кеча бўлиб ўтган конклав натижасида Роберт Прево янги Рим папаси этиб сайланди. Бу билан у католик черкови тарихидаги илк америкалик Папага айланди. У Ватикан тахтига Лев XIV номи билан чиқди.

Zamin.uz таҳририяти бу воқеани дин ва маданият кесишувидаги қизиқарли нуқта сифатида баҳолайди. Замонавий технология ва кинематография ҳатто муқаддас жараёнларга ҳам амалий ёрдам сифатида қўлланилиши мумкинлигини кўрсатди. «Замин»ни Telegram’да ўқинг!