Эрлинг Ҳоланд яна бир ноёб Ferrari сотиб олди: унинг автомобиллар коллекцияси янада ҳашаматли бўлди

«Манчестер Сити»нинг юлдуз ҳужумчиси Эрлинг Ҳоланд ўзининг ҳашаматли ва қимматбаҳо автомобиллар коллекциясини яна бир ноодатий суперкар билан тўлдирди. Норвегиялик футболчи бу сафар тахминан 320 минг фунт стерлинг (375 минг евро атрофида) қийматга эга бўлган ёрқин сариқ рангдаги Ferrari харид қилган.

Ҳоланднинг қимматбаҳо автомобилларга бўлган қизиқиши аввалдан маълум бўлиб, бу унга мухлислар ва оммавий ахборот воситалари томонидан алоҳида эътибор қаратилишининг сабабларидан бири ҳисобланади. Айни пайтда унинг шахсий гаражида Bugatti, Mercedes AMG ҳамда Rolls-Royce каби машҳур ва қимматбаҳо брендларнинг турли моделлари мавжуд. Эрлинг бу билан чекланмай, аввал ҳам Ferrari русумидаги автомобиль харид қилган эди. Фақат ўшанда у Ferrari 812 Superfast Blue моделига эгалик қиларди. Ушбу модел ҳали ҳам футболчининг автомобиллар коллекциясидан ўрин эгалламоқда.

Бу сафар футболчи янада ажойиб кўринишга эга бўлган сариқ Ferrari’ни ўз гаражига қўшган. Бу ноёб автомобил ўзининг дизайни ва кўриниш жиҳатидан ажралиб туради ва у коллекционерларнинг орзусидаги машиналардан бири сифатида эътироф этилади.

Ҳоланднинг профессионал фаолияти ҳақида гапирганда, у 2022 йилдан бери «Манчестер Сити» таркибида ажойиб натижалар қайд этиб келмоқда. Жорий мавсум давомида норвегиялик ҳужумчи жами 41 та учрашувда майдонга тушиб, рақиблар дарвозасини 30 марта аниқ нишонга олган ва 4 марта голли узатма муаллифи бўлган. «Шаҳарликлар» билан шартномаси эса 2035 йилга қадар имзоланган.

Transfermarkt портали маълумотларига кўра, Эрлинг Ҳоланднинг бозор қиймати ҳозирги вақтда 200 миллион евро атрофида баҳоланмоқда.

Шунингдек, аввалроқ футболчининг келажаги борасида «Барселона» ҳамда «Реал» Мадрид клублари ўртасида танлов қилгани ҳақидаги хабарлар тарқалган эди. Аммо ҳозирча у «Манчестер Сити» билан шартномага содиқ қолмоқда. «Замин»ни Telegram’да ўқинг!