Россия қўшинларининг ҳарбий жиноятлари: CNN даҳшатли далилларни ошкор қилди!

21 май куни Американинг CNN телеканали Украина разведкаси томонидан тақдим этилган қўрқинчли аудио ва видео ёзувларни оммага ошкор қилди. Ушбу материаллар Россия армияси қўмондонларининг таслим бўлган украиналик ҳарбийларни халқаро ҳуқуқни бузган ҳолда қатл этиш бўйича буйруқлар берганини тасдиқловчи янги далил сифатида кўрилмоқда.

Украина махсус хизматлари тақдим қилган аудиоёзувларда «Арта» ва «Белий» чақирув белгилари остида ҳаракат қилувчи номаълум россиялик офицер ўз қўл остидагиларга асир тушган украиналик ҳарбийларнинг фақат командирини асирга олишни ва қолганларини шафқатсизларча қатл қилишни бир неча бор буюргани яққол эшитилади. Аниқланган маълумотларга кўра, ушбу суҳбат 2024 йилнинг ноябрида, номаълум бир кунда, соат 12:05 дан 12:31 гача Запорижжя вилоятидаги Новодаровка қишлоғи яқинида ёзиб олинган.

CNN телеканали ушбу аудиоёзувларни айнан шу вақтда ва шу ҳудудда дрон орқали олинган видеотасвир билан бирлаштириб, кенг жамоатчилик эътиборига ҳавола қилди. Видеокадрларда олти нафар украиналик ҳарбий ерга ётқизилган ҳолатда кўриниб туради. Кейин эса улардан камида икки нафари яқин масофадан отиб ташланади. Ўлдирилган аскарларнинг командири деб тахмин қилинган яна бир ҳарбий эса россиялик аскарлар томонидан олиб кетилади. Энг даҳшатлиси шундаки, ушбу қатл амалга оширилган пайтда жиноятчиларнинг ҳаракатлари радио орқали берилган буйруқларга аниқ мос келган.

Украина хавфсизлик хизмати (СБУ) мазкур жиноятни Россия армиясининг 5-армияси 127-дивизиясига тегишли 394-мотоўқчи полки ҳарбий хизматчилари томонидан содир этилганлигини маълум қилди. Шунингдек, СБУ мазкур бўлинма томонидан бундан ташқари бошқа жиноятлар ҳам амалга оширилганига ишонмоқда ва бу йўналишда суриштирув ишларини давом эттиряпти.

CNN томонидан ошкор қилинган ушбу даҳшатли факт халқаро жамоатчиликда жиддий резонанс уйғотди. Бу ҳолат яна бир бор ҳарбий можароларда инсон ҳуқуқлари ва халқаро қонунлар қандай қўпол тарзда бузилаётганини кўрсатмоқда.

Zamin.uz таҳририяти Украинадаги вазият ривожини диққат билан кузатишда давом этади. Сизнингча, бу жиноятларга қарши халқаро ҳамжамият қандай чоралар кўриши керак?