Ким Кардашьян 6 йиллик саъй-ҳаракатдан сўнг ҳуқуқшунос бўлди

Голливуд юлдузи, реалити-шоу иконаси ва таниқли бизнесвумен Ким Кардашьян ўз ҳаётидаги энг асосий мақсадлардан бирига эришди — у расман ҳуқуқшунос дипломига эга бўлди. Бу ҳақда у 44 ёшида ўзининг шахсий блогида фахр билан эълон қилди.

Кимнинг таълимга бўлган қизиқиши нафақат шахсий илҳом, балки отаси, машҳур адвокат Роб Кардашьян хотираси билан боғлиқ орзусидан келиб чиққан. У фаолиятини фақат кўнгилочар телекўрсатувлар ва мода соҳаси билан чегаралаб қўймасдан, қонун устуворлиги ва инсон ҳуқуқлари йўлида ҳам ҳаракат қилишни мақсад қилган.

6 йиллик кураш ва 5000 соатлик таҳсил

Аслида бу ҳуқуқшунослик таълими тўрт йилга мўлжалланган эди, аммо пандемия ва Кимнинг бошқа ижодий ҳамда бизнес фаолиятлари сабаб, у таълимни 6 йилда якунлади. У ўз уйининг орқа ҳовлисида самимий ва шинам битирув маросимини уюштириб, яқин дўстлари ва оила аъзолари иштирокида бу тарихий лаҳзани нишонлади.

Машҳур ҳуқуқшунос, Кимнинг ўқув маскандаги маслаҳатчиси Жессика Жексон таъкидлашича, Кардашьян бирор марта ҳам имтиёз талаб қилмаган. Унинг таълими ҳафтасига 8 соатдан йилига 48 ҳафта давом этган — бу жами 5184 соатлик тинимсиз юриспруденция ўқув жараёнини англатади. У шу вақт мобайнида тўрт фарзандини тарбиялади, бир нечта бизнес лойиҳаларини бошқарди, телевидениедаги ролларини давом эттирди ва жамоат ишларида фаол бўлди.

Имтиҳонлар ва қатъият

Ким Кардашьян коллежда ўқимаган бўлса-да, махсус ҳуқуқий амалиётга асосланган дастурда қатнашди. Бу унинг ҳуқуқшунос бўлиши учун ягона қонуний йўл эди. Таълим жараёнида у ҳамкасблари каби барча назарий ва амалий имтиҳонларни топширди. Ҳатто муҳим имтиҳонлардан бирини уч марта қайта ёзишига тўғри келган.

Кардашьян фақат ҳаётда эмас, балки экранда ҳам қонун ва адолат тарафдори. У яқинда бош ролда суратга тушган “Ҳаммаси рост” сериалининг биринчи тизери тармоқда тарқалди. Ушбу сериалда Кардашьян ўз ҳуқуқшунослик фаолияти давомида тўплаган билим ва тажрибасини амалга татбиқ этади.

Zamin.uz таҳририяти машҳур шахсларнинг ҳуқуқ, билим ва ижтимоий фаолликка бўлган саъй-ҳаракатларини ижобий намуна сифатида қўллаб-қувватлайди. Сиз Ким Кардашьяннинг саъйи-ҳаракатини қандай баҳолайсиз? У ҳақиқатан ҳам ҳақиқий ҳуқуқшунос сифатида жамиятга хизмат қила оладими?