Мальта ҳам Фаластин мустақиллигини тан олади

Мальта яқин орада Фаластин давлатининг мустақиллигини расман тан олишини эълон қилиши кутилмоқда. Бу ҳақда мамлакат бош вазири Роберт Абела маълум қилди, деб ёзмоқда Times оf Мalta нашри.

Таъкидлаш жоизки, Мальтада аллақачон Фаластин элчихонаси фаолият юритмоқда. Бундан ташқари, Мальта 2024-йилги БМТ Бош ассамблеясида Фаластин давлатининг ташкилотга тўлиқ аъзолик мақомини қўллаб-қувватлаган. Шунга қарамай, ҳозирга қадар ушбу давлатни расман тан олиш ҳақида баёнот берилмаган эди.

Бош вазир Абела бу борадаги расмий эълон 20-июн куни БМТ кўмагида, Саудия Арабистони ҳамда Франция ташаббуси билан ўтказиладиган халқаро конференцияда эълон қилинишини билдирди. Мальта томони, конференцияда Фаластинни тан оладиган ягона давлат бўлишмаслигини ҳам таъкидлади.

Шу билан бирга, Ахиос нашрининг ёзишича, Франция ҳам шу йил июн ойида Фаластин мустақиллигини тан олишни режалаштирмоқда. Франция президенти Эммануел Макрон 2025-йил апрелида берган интервюсида яқин ойлар ичида бу борада баёнот беришни мўлжаллаётганини айтган эди.

Мазкур эҳтимолий қарорлар турлича муносабатларга сабаб бўлмоқда. “ҲАМАС” ҳаракати Франциянинг бу қарорини “муҳим сиёсий қадам” дея баҳолаган бўлса, Исроил ташқи ишлар вазири Гидеон Саар эса Фаластин давлатининг тан олинишини “сохта давлатни тан олиш” ва “терроризмга мукофот” деб атади.