Россияда даҳшатли ҳалокат: кўприк қулаб, поезд ағдарилиши оқибатида ҳалок бўлганлар бор!

Россиянинг Брянск вилоятида кечаси содир бўлган мудҳиш ҳалокат натижасида 7 киши ҳалок бўлди ва 30 киши турли даражада жароҳат олди. Маълум қилинишича, вилоят ҳудудидан ўтган автомобил кўприги кутилмаганда темирйўл устига қулаб тушган ва бу вақтда кўприк остида ҳаракатланаётган, Климово шаҳри томонидан Москвага йўл олган 86-сонли йўловчи поезди шу заҳоти релслардан чиқиб, вагонлари ағдарилиб кетган.

Брянск вилояти губернатори Александр Богомазнинг ўз телеграм-канали орқали берган баёнотига кўра, авария натижасида 7 киши ҳалок бўлган ва жароҳатланган 30 киши зудлик билан шифохоналарга жойлаштирилган. Уларнинг орасида икки нафар ёш бола ҳам борлиги маълум қилинган. Ҳодиса содир бўлганидан сўнг, фавқулодда вазиятлар вазирлиги воқеа жойидаги вазиятни ўрганиб, зарар кўрган йўловчиларни қутқариш ишларини бошлаб юборди.

Авария ҳақидаги илк маълумотларда ҳалок бўлганлар сони уч киши сифатида кўрсатилган бўлса-да, губернаторнинг кейинги маълумотига кўра, ҳалок бўлганлар сони етти кишига етган. Россиянинг тергов қўмитаси ҳозирча авария юзасидан аниқ сабабларни айтмаган бўлса-да, дастлабки маълумотларда кўприк қулаб тушиш сабаби “транспорт фаолиятига ноқонуний аралашув” деб белгиланган. Айнан бу термин эса одатда темирйўлларда портлаш ёки бошқа шу каби қасддан уюштирилган ҳодисалар содир бўлганда қўлланилади.

Россия темирйўллари департаменти хабарига кўра, Брянск вилоятидаги Пилшино - Вйгоничи йўналишида содир бўлган ушбу мудҳиш воқеа кечаси соат 22:44 да қайд этилган. Ҳодиса вақтида кўприк остида ҳаракатланаётган поезд темир йўлдан чиқиб, локомотив ва вагонлари ағдарилиб кетган. Кўприк конструкцияси қулаб тушиши билан, поезднинг бир неча вагонлари кучли зарб билан заҳаланган.

Айни пайтда Россия фавқулодда вазиятлар вазирлиги қутқарувчилари жиддий зарар кўрган вагонларни қисмларга ажратиб, қолган йўловчиларни ва зарар кўрганларни тезкорлик билан чиқариш ҳамда хавфсиз ҳудудларга олиб чиқиш ишларини давом эттирмоқда. Қутқарувчилар ҳали ҳам воқеа жойида одамлар бўлиши мумкинлигини назарда тутиб, ҳар бир бўшлиқни текшириб чиқмоқда.

Ҳодиса юзасидан Россия тергов қўмитаси вакиллари томонидан ўрганиш ишлари бошланган ва кўприк қулаб тушган ҳудуд тўлиқ назорат остига олинган. Россия хавфсизлик кучларига яқин бўлган Baza ва Shot телеграм-каналлари эса бу аварияга портлаш сабаб бўлгани ҳақида хабар тарқатди. Аммо ҳозирча расмий идоралар бу даъволарга нисбатан ҳеч қандай аниқ жавоб бермаган ва портлаш сабаби бўйича ҳеч қандай изоҳ берилмаган.

Ҳодиса натижасида жароҳат олганларнинг аҳволи оғир бўлганлари зудлик билан махсус тиббий хизматлар орқали Москва шаҳридаги ихтисослашган шифохоналарга олиб борилиши мумкинлиги ҳам губернатор Александр Богомаз томонидан таъкидланди.

Россия темирйўллари бошқармаси жабрланмаган йўловчиларни автобусларда Брянск-Орловский вокзалига олиб боришни ташкил қилди. Шу билан бирга, мазкур авария туфайли Брянск вилояти ҳудудидан ўтадиган А-240 автомобил трассаси тўлиқ ёпилган.

Ҳодиса вақтида кўприк устида Россиянинг энг йирик агрохолдингларидан бири ҳисобланган «Мираторг» компаниясининг оғир юк машинаси бўлган. Унинг ҳайдовчиси ҳам жиддий жароҳат олган бўлиб, унга тез тиббий ёрдам кўрсатилмоқда. Бу ҳақда компания матбуот хизматига таяниб, «РБК» хабар тарқатди.

Мазкур воқеа Брянск вилояти учун ўта жиддий ва даҳшатли ҳалокатлардан бири сифатида қайд этилади. Айнан мазкур ҳудуд Россиянинг Украина билан чегарадош қисмида жойлашган бўлиб, бу каби ҳодисаларнинг содир бўлиши хавфсизлик бўйича қўшимча чоралар кўрилишини тақозо этмоқда. Ҳозирча аниқ сабабларни ўрганиш ишлари давом этмоқда ва мутасаддилар бу фожеали авариянинг сабаблари ва оқибатлари ҳақида қўшимча маълумотлар берилишини ваъда қилган.

Ҳозирча фақат бир нарса аниқки, ушбу ҳалокат кўплаб инсонларнинг ҳаётини ўзгартирди ва жиддий хавфсизлик чораларини кучайтириш зарурлигини яна бир бор исботлаб берди.