Кёлн марказида 20 минг киши эвакуация қилинади – портламаган бомба хавфи

Германиянинг йирик саноат шаҳри ҳисобланган Кёлн яна тарихнинг оғир изларини эслатмоқда. Иккинчи жаҳон уруши давридан қолган портламаган бомбалар сабабли шаҳар марказида катта эвакуация ишлари режалаштирилмоқда.

Маҳаллий расмийларнинг баёнотига кўра, 4- июн куни эрталабки соат 8:00 дан бошлаб Кёлн шаҳрининг бир неча туманларида аҳолининг хавфсизлиги учун фавқулодда чоралар кўрилади. Сабаби – АҚШ томонидан Иккинчи жаҳон уруши пайтида шаҳарга ташланган, лекин портламаган учта бомба топилган. Уларнинг вазни 1 ва 2 тоннага тенг бўлиб, юқори даражада хавф туғдиради.

Зарарсизлантириш операцияси – кенг кўламли ҳаракат

Мутахассислар ушбу оғир бомбаларни эҳтиёткорлик билан зарарсизлантириш устида иш олиб боради. Бунинг учун портлаш хавфи мавжуд ҳудуддан тахминан 1 километр радиусдаги жойда яшовчи 20 мингга яқин аҳолини вақтинча кўчириш режалаштирилган.

Шаҳар бошқаруви, бир қатор мактаблар, болалар боғчалари, музейлар ва муҳим идоралар фаолиятини тўхтатади. Эвакуация ҳудуди Кöлннинг марказий вокзалининг айрим қисмларини ҳам ўз ичига олган. Бундан ташқари, Рен дарёси устидаги учта асосий кўприк бир неча соатга ёпилади.

Транспорт тизими издан чиқмоқда

Германиянинг темирйўл тизими – Deutschэ Баҳн компанияси эвакуация сабабли поезд қатновларида сезиларли узилишлар бўлиши ҳақида огоҳлантирди. Ҳозирча қайси йўналишларга қандай таъсир бўлиши аниқ кўрсатилмаган, бироқ бу нафақат ички, балки халқаро рейсларга ҳам ўз таъсирини ўтказиши мумкин.

Тарихий миқёсдаги эвакуация

Кёлнда бу каби кенг кўламдаги хавфсизлик операцияси урушдан кейинги даврда илк бор амалга оширилмоқда. Ҳудудда яшовчи фуқаролар, хусусан кексалар, болалар ва ногиронлар учун алоҳида транспорт ва тиббий ёрдам хизматлари ҳам сафарбар қилинади.

Расмийлар аҳолига хотиржамликни сақлаш, кўрсатмаларга қатъий риоя қилиш ҳамда эвакуация бўйича эълон қилинадиган янгиликларни кузатиб боришни тавсия қилмоқда.

Эслатма: Бундай ҳолатлар Германияда кам учрайди, аммо уруш йилларидан қолган портламаган бомбалар ҳар йили бир неча марта аниқланади. Шунинг учун ҳам, хавфсизлик протоколлари қатъий ва пухта ишлаб чиқилган.